CEBU, Philippines - Mirehistro og laing daog ang Bureau of Internal Revenue (BIR)-Cebu ni coach Norwin Honoridez ug ang USC-South Violet ni skipper Romeo Faunillan aron moabante sa finals sa 2011 USC-BED South Campus PTCA Inc. basketball tournament niadtong Domingo didto sa USC South Campus covered court sa dalan J. Alcantara, ning siyudad.
Ang BIR mipukan sa USC South-White nilang Frankie Lastimoso ug Abe Galinato sa iskor nga 82-72, samtang ang USC South-Violet naka-eskapo gikan sa mga kamot sa mas paboritong USC South-Red nga gipangulohan ni top center Cesar Ortega sa iskor, 93-91.
Biya unta ang BIR sa first period, 21-24, apan nabali ang dagan sa duwa ug mao na milabaw sa halftime, 39-34.
Nagtusaktusak ang mga puntos sa BIR sa third period diin ilang na-outscore ang USC White, 21-13 sa pagpangulo ni ex-UV Lancer Jerson Espinosa uban nilang ex-SWU Cobra Cris Litorja ug Kim Valenzuela aron moposte’g 13 puntos nga abante.
Misukli ang USC-White pinaagi sa ilang 32-22 nga rally sa giya ni ex-USJ-R Jaguar Frankie Lastimoso ug Abe Galinato, apan pakyas sila sa pagpapas sa labaw tungod kay nakabsan sila’g oras.
Sila si Litorja ug Kim Valenzuela maoy nangu sa BIR sa ilang 18 ug 17 puntos matag usa, samtang sila si Andre Tocao ug Espinosa nagkumboya og 24 puntos.
Si Lastimoso miposa og 28 puntos aron pangulohan ang USC-White ug Galinato miamot og 25 puntos.
Sa sayo pa, usa ka crucial defensive rebound ni Ronald Libre sa katapusang otso segundos ug dayong hapos ngadto kang Ralph Ybañez, kinsa maoy miiskor sa winning jumpshot, maoy nagsalbar sa USC-Violet alang sa usa ka kulbahinam kaayo nilang kadaugan.
Si Ybañez maoy nangu sa Violet pinaagi sa iyang 27 puntos, samtang si Danray Baclay miamot og 19 puntos.
Nangulo sa Red mao si Ortega, kinsa miburak og 21 puntos, gisundan ni Boyet Mercado nga adunay 19 puntos.
Puntos matag usa
Unang duwa:
USC-VIOLET (93) - Ybañez 27, Baclay 19, Mier 11, Libre 10, Faunillan 6, Paca 5, Alesna 4, Waskin 4, Lagumbay 3, Kintanar 2, Rivera 2
USC-RED (91) - Ortega 21, B. Mercado 19, Oyao 12, Quijada 8, Ibon 6, L. Nuñez 6, A. Mercado 5, Dela Torre 5, N. Nuñez 4, Cagalitan 3, Resma 2
Ikaduhang duwa:
BIR (82) - Litorja 18, Valenzuela 17, Tocao 14, Espinosa 10, Credo 8, Alburo 4, Ortiz 3, Del Rosario 2, Dizon 2, Llavore 2, Galvez 2
USC-WHITE (79) - Lastimoso 28, Galinato 25, A. Satorre 11, Mayordo 7, Gayoso 4, Melgo 2, Arquillos 2 (BANAT NEWS)