P200T GIandam alang SA CBA cagefest

CEBU, Philippines - Andam na ang tanan alang sa 2nd Cebu Basketball Association (CBA)-M. Lhuillier Kwarta Padala Cebu City Mayor’s Cup nga buksan karong Domingo diha sa Cebu Coliseum.

Gikan sa orihinal nga duha ka division, nasabotan sa mga organizers nga usahon na lang ang kategoriya sa unom ka koponan nga mag-ilog sa P100,000 ganting salapi ug tropeyo.

Mangulo sa unom ka partisipanteng koponan mao ang defending champion Salazar Colleges of Science and Institute of Technology (SCSIT) Skyblazers uban sa CESAFI first runner-up Southwestern University (SWU) Cobras, ThreeSixty Pharmacy-Online Training Camp, Rollway Customs Brokerage, Ave Maria Sanctuary Park ug Asian College of Technology (ACT) Cyber Knights.

Mahimong higpit ang kompetisyon sa maong torneyo dihang gikompirmar sa ThreeSixty-Online nga moduwa uban kanila ang mga ex-pros nga sila si Ken Bono ug Dino Daa uban ang duha ka players sa Dela Salle University. Anaa usab ang mga batan-ong basketball prospects nga sila si Mark Jayven Tallo, Neil James Sumayang ug Mark Kong.

Ang torneyo mosubay og single-round robin format, diin ang No. 1 ug No. 2 teams makakuha og "twice-to-beat" advantage sa semifinals.

Ang second placer makadawat og P50,000, samtang ang third ug fourth placers mobulsa og P30,000 ug P20,000 matag usa. (BANAT NEWS)