Mandaue, Liloan pabiling way pilde

CEBU, Philippines - Nagpabiling walay pilde ang defending champion Mandaue City ug Liloan belles sa quarterfinal round sa 7th Governor Gwen Garcia Unity Volleyball (GUV) Cup kagahapon didto sa Cebu International Convention Center (CICC) sa Mandaue City.

Ang duha ka kampo pulos nagbitbit og 5-0 nga baraha aron magsolo sa unang dapit sa tagsa-tagsa nila ka brakcet uban sa Talisay City, Catmon sa brackets A ug B.

Ang Mandaue mipilde sa Barili, 25-12, 25-16 sa pagpangulo sa ilang reinforcements sa Philippine Team member Joanne Bunag ug Erika Camille Verano.

Miabag sab sa kadaugan sa Mandaue silang kanhi PHL Youth mainstay Genie Sabas, Jusabelle Brillo, Danika Gendrauli, Apple Saraum ug Rachelle Hanna Singson.

Sa laing bahin, ang Liloan miagi pa og kalisud una nila makab-ot ang makutas nga kadaugan batok sa Sogod, 25-15, 25-23.

Responsable sa kadaugan sa Liloan mao si PHL team member Aiza Maizo ug Jovelyn Gonzaga sa Central Philippine University sa Iloilo uban nilang Fretzie Aligway, Katherine Jumapao ug Neressa Villanueva.

Sa laing mga aksiyon, ang Tuburan ug Alegria nidaog sa Minglanilla ug Dalaguete pinaagi sa default.  (BANAT SPORTS)