Mandaue mipulbos sa Alegria sa 7th GUV CUP

CEBU, Philippines - Mipakita og maayong tilimad-on ang defending women's champion Mandaue City sa pagsugod sa quarterfinal round sa 7th Governor Gwen Garcia Unity Volleyball (GUV) Cup sa miaging adlaw didto sa Summit Hall sa Cebu International Convention Center (CICC) sa Mandaue City.

Ang Mandaue mipulbos sa Alegria, 25-13, 25-16 kortesiya sa ilang reinforcements sa Philippine team member Joan Bunag ug Erika Camille Verano uban sa kanhi PHL Youth mainstay Genie Sabas, Jusabelle Brillo, Rachel Hanna Singson ug Danika Gendrauli.

Sa laing bahin, ang Talisay City midemolis sa Dalaguete, 25-8, 25-14 luyo sa mapintas nga ataki nilang Jullette Mae Marikit ug Florian Gutierrez.

Wala sab magpalupig ang Liloan dihang ilang gimasaker ang Tuburan, 25-9, 29-27 pinaagi nilang PHL team member Aiza Maizo ug Jove Gonzaga gikan sa University of St. La Salle (USLS)-Bacolod.

Midaog sab ang Catmon ug Barili batok sa tagsa-tagsa nilang kaatbang. Ang Catmon mipukan sa Minglanilla, 25-21, 25-17, samtang ang Barili nidaog pinaagi sa default batok sa Sta. Fe.  (BANAT SPORTS)