Earth Run 2011 gitakda sa Disyembre 18

CEBU, Philippines - Talagsaong lumba ang mahitabo sa pagsikad sa Earth Run 2011 karong Disyembre 18 didto sa Parkmall sa Mandaue City.

Tungod kay sa labing unang higayon usa ka kategoriya ang gipuno alang sa mga dog lovers diin ang iro ug ang tag-iya magdungan sa pagdagan sa gilay-on nga 1.5 kilometro.

Si race director Christian Cortes nagkanayon nga gituyo nila ang pagbutang sa maong kategoriya aron makahigayon ang pet owners nga makapakita sa ilang abilidad sa running uban sa binuhi nilang iro.

 Sa 2,000 ka runners nga gilaumang moapil sa lumba, 500 niini gikan mga dog owners.

Lain pang kategoriya nga tigian mao ang 10K, 5K ug 3K fun run.

Mga ganting salapi ang giandam alang sa top three finishers sa 10K, 5K ug 3K, samtang freebies ug tropeyo ang madawat sa mga winners sa dog lovers category.

Niadtong interesadong mosalmot, ang registration fee nagkantidad og P250 sa tulo ka kategoriya, samtang P200 alang sa dog lovers category. Mahimong magrehistro   sa Parkmall, Chris Sports Ayala Center-Cebu ug SM City-Cebu.  (BANAT SPORTS)