CEBU, Philippines - Pabiling wala gihapon makatilaw og pilde ang PhilHealth five ni coach Aries Jayme diin naghupot na sila’g 6-0 nga baraha sa nagpadayong Association of Regional Executives in National Agencies (ARENA-7) basketball tournament human ilang gilubong ang Bureau of Internal Revenue (BIR)-Cebu ubos ni regional director Rodita Galanto ug assistant direc- tor Conrad Lee sa iskor, 62-48 sa Group B didto sa Sacred Heart School gym sa Gen. Maxilom avenue ning dakbayan.
Sayong naglabaw og double figures ang PhilHealth pinaagi sa baskets gikan nilang Albert Anadon ug Nigel Catao, 38-27 apan misikit sa makadiyot ang BIR kinsa miduslit og 11-7 run sa third period sa iskor, 38-45 sa kataposang 10 minutos sa duwa.
Dali ra sab hinoon kaayong misukli og 17-10 run ang PhilHealth sa fourth period ug mipaburot sa ilang abante ngadto sa 14 puntos ug wala na maka-apas ang BIR kinsa nahiagum sa labing unang two-game losing streak.
Si Anadon maoy nangu sa PhilHealth sa iyang 18 puntos samtang si Carlo Yu miamot og 10 puntos.
Sila si Chris Diamos ug Allen Sorela miposa og 11 ug 10 puntos matag usa aron pangulohan ang BIR.
Puntos matag usa:
PHILHEALTH (62)- Anadon 18, Yu 10, Yap 9, Catao 7, Sasang 5, Magallanes 4,Derder 3, Palma 2, Ornopia 2, Quiñanola 2
BIR (48)—Diamos 11, Sorela 10, Dizon 7, Galvez 6, Bonsucan 5, Del Rosario 4, Meso 2, California 2, Detorio 2, Alburo 1. - BANAT NEWS