CEBU, Philippines - Nakuha gyud ni WBA light middleweight champion Miguel Cotto ang dugay na niyang gipangandoy nga panimalus dihang iyang gipaundang sa dayun sugod sa round 10 ang Mehikanong si Antonio Margarito kagahapon didto sa Madison Square Garden, New York.
Grabeng kastigo ang gipahamtang ni Cotto (37-2, 30KOs) dihang iyang giseguro pag-igo ang bag-o lang gioperahan nga mata sa Mehikano nga si Margarito (38-8) nga maoy rasun og nganung napugos ang ring physician pag-undang sa away.
Mihubag ug misira ang tuong mata ni Margarito nga niadtong miaging tuig lang naangol dihang nakigsangka siya ni Manny Pacquiao.
Mipakita sa iyang kalig-on si Margarito human maigo sa sunod-sunod nga tira ni Cotto, apan ang iyang kaisug wala musalir dihang hinay-hinay nga misira ug mihubag ang iyang mata nga tataw kaayo nga maoy kanunay ig-on ni Cotto sa iyang jab.
Si Cotto nagkanayon nga dakung kalipay ang iyang nabati tungod kay napamatud-an niya nga siya gyud ang mas kusgan nga boksidor itandi ni Margarito kinsa maoy labing unang mipahamtang kaniya og pilde niadtong tuig 2008.
Apan ang maong kadaugan naputos sa kontrobersiya human gidudahan si Margarito nga migamit og illegal nga pampagahi sa handwraps.
“He means nothing to me,” matud pa ni Cotto atol sa post-fight press conference.
Hinuon bisan pa sa pag-undang sa away, si Margarito nangangkon nga mapilde pa niya si Cotto kun natiwas lang hangtud sa round 12 ang away.
“I needed two more rounds to beat this man,” matud pa ni Margarito kinsa mitambong gihapon sa post-fight press conference bisan sa nagkadugo nga mata. LPM gikan sa AP