2011 CBA Mayor's Cup sugdan dec. 17

CEBU, Philippines - Laing kulbahinam nga aksiyon ang masaksihan sa mahiligon sa basketbol dihang ang 2011 Cebu Basketball Association (CBA) Mayor's Cup mosikad karong Disyembre 17 diha sa Cebu Coliseum.

Ang torneyo gibahin sa duha ka kategoriya -- ang Open A alang sa commercial teams uban ang ilang mga ex-pros ug former varsity players ug Open B nga eksklusibo lamang sa mga active collegiate varsity players.

Atol sa gipahigayong tigum sa mga organizers ug team representatives kagahapon didto sa Cebu City Hall, si CBA commissioner Raul 'Yayoy' Alcoseba miingon nga gamiton nila ang torneyo isip kabahin sa ilang preparasyon alang sa   CESAFI players sa sunod season.

Gitug-an ni Alcoseba nga nahinabi na niya si CESAFI commissioner Felix O. Tiukinhoy, Jr., kinsa mihangop sa ideya nga himuon ang CBA isip usa sa mga paagi aron mahatagan og exposure ang mga collegiate players.

"Nag-storya nami ni Tiukinhoy regarding this matter and okay man siya," matud pa ni Alcoseba, kinsa mao sab ang head coach sa Southwestern University (SWU) Cobras. "Ato ning gituyo aron mahatagan og exposure ang mga bata."

Giklaro hinuon ni Alcoseba nga gilimitahan lang ngadto sa upat ka koponan ang makasalmot sa matag kategoriya.

Mga koponan nga mopakita'g aksiyon sa Open A division mao ang Salazar Colleges of Science and Institute of Technology (SCSIT) Skyblazers, Ave Maria Sanctuary Park, Asian College of Technology (ACT) Cyber Knights ug Rollway Customs Brokerage.

"We are still waiting for the teams who will be competing in Open B and we encourage all CESAFI teams nga paapilon ang ilang mga players and reserves," dugang pa ni Alcoseba.

Ang torneyo mosubay og double round robin format, diin ang No. 1 team maoy makakuha sa "twice-to-beat" advantage batok sa second-ranked team sa finals. Ang No. 3 ug No. 4 mao usab ang magduwa alang sa ikatulong dapit.

Ang kampiyon mobulsa og P50,000, ang first runner-up makaangkon og P30,000 ug ang third ug fourth placers makadawat og P10,000 matag usa.  (BANAT SPORTS)