Niños nagmilagro sa unang adlaw sa CVIRAA MEET

CEBU, Philippines -  Gisugdan sa Cebu City Niños ang ilang kampanya alang sa ika-19 nilang sunod-sunod nga overall championship dihang mihakot kini og kinatibuk-ang   24 golds, upat ka silvers ug unom ka bronzes sa athletics ug swimming events sa 2011 Central Visayas Regional Athletic Association (CVIRAA) Meet kagahapon didto sa Carlos P. Garcia Sports Complex sa Tagbilaran City.

Sa unang adlaw pa lang, ang Niños miani dayon og 21 golds sa swimming.

Ang Mandaue City nga gibiyaan og layo mipahiluna sa ikaduha sa ilang lima ka golds, duha ka silvers ug usa ka bronze, samtang ang Dumaguete City temporaryong nahimutang sa ikatulo uban ang tulo ka golds, unom ka silvers ug upat ka bronzes, gisundan sa Talisay City nga adunay duha ka golds ug tag-tulo sa silver ug bronze ug Cebu Province nga adunay 2-gold, 3-silver medals.

Si Allan Cartuciano sa San Nicolas Elementary School unang mihatag og bulawan pinaagi sa elementary boys shot put. Ang laing duha ka golds sa Niños sa athletics gitunol nilang Bera Rose Saragena sa Cebu Institute of Technology-University (CIT-U) sa secondary girls shot put sa gilay-on nga 8.52 metros ug Stella Marris Malingin sa University of Cebu (UC) sa long jump sa distansya nga 4.93.

Ang Mandaue mihipos og lima ka golds sa athletics kortesiya nilang Aldrin Agang sa secondary boys 1,500m run ug Shanelle Siasoyco ug Ken Mantillano sa shot put.

Si Lovely Mae Andrin sa Lapu-Lapu City mihakot og bulawan sa secondary girls 1,500 run, samtang si Jonave Noquillo sa Cebu Province nidominar sa elementary girls category.

Didto sa CPG Aquatic Center, ang Team Cebu City tankers mikubkob og 17 golds ug ingon man usa ka clean sweep sa 4x100 relay.

Ang elementary boys mi-oras og singko minutos ug 5.53 segundos kortesiya nilang Matthew Angelo Caneda, Cristante Veloso, Jonas Chiong ug Brian Minerva, samtang ang ilang girls counterparts gilangkuban nilang Kyla Ebon, Langeline Hermoso, Jamina Sembrano ug Rhoida Macawili nga mi-oras og 5:50.94.

Ang secondary boys mi-oras og 4:19.84 luyo sa mga paningkamot nilang Nicholas Chiong, Keith Ocampo, Kirk Tristan Ebon ug Kyle Nemut, samtang ang secondary girls mimarka og 4:55.28 pinaagi nilang Apriel Goden, Carmel Ocmapo, Kyshia Candia ug Razel Cabigas.

Sa football event, ang Don Bosco Technology Center nga gibitoonan sa TCC booters mipukan sa Lapu-Lapu City, 4-0, ang Cebu Province mipilde sa Mandaue City, 2-0, samtang gisirohan sab sa Negros Oriental ang Bohol, 3-0.

Sa basketball, ang Niños nga gitimonan sa University of the Visayas (UV) Baby Lancers uban sa reinforcements gikan sa Cebu Eastern College (CEC) Dragons, milubong buhi sa Talisay City, 121-58. Kinahanglang modaog ang Niños batok sa Toledo aron moabante sa semifinal round.

Sa duwang volleyball, ang Abellana National School (ANS) miharos sa Bayawan City, 25-7. 25-12.

QCU-B milansang ikaduha nilang daog sa Aboitiz football

Milansang sa ilang ikaduhang daog ang Queen City United (QCU)-B aron magsolo sa liderato sa bracket-B sa men's open division sa 14th Aboitiz Cup Football Tournament sa miaging adlaw didto sa Aboitiz Sportsfield sa barangay Subangdaku, Mandaue City.

Human sa ilang pagpulbos sa Don Bosco United FC sa miaging semana, ang QCU-B nagpabilin sa ilang kainit dihang gisirohan nila ang Uptown United, 6-0.

Sa men's open Group-B, ang Panalpina World Transport nakalingkawas gikan sa mga kamot sa DB Magone pinaagi sa pag-iskor og 2-1 nga kadaugan.

Sa laing aksiyon, ang Giuseppe milubong sa PAREF-Springdale, 6-0 sa players 8 category. Apan ang Springdale nakabangon pinaagi sa pagposte og 3-2 nga daog sa players 10 division.

Ang San Roque Football Club (SRFC) sa ilang bahin, miposte og duha ka daog batok sa Montessori School sa Lapu-Lapu pinaagi sa 4-1 nga decision sa players 6 ug 5-1 demolition sa players 10 category.

Miposte sab og duha ka daog ang Don Bosco dihang ang ilang Team C nimasaker sa CPMS, 4-0 ug ang ilang Team 4 mimakmak sa BMALV, 3-0 sa players 6.

Apan ang Don Bosco Team 3 nasugamak ngadto sa Canduman Dedon, 2-0.

LLBA manulong sa Rama Boys

Magtakus karon ang LLBA Selection ug Rama Boys sa usa ka exhibition match sa alas-7 sa gabii didto sa Abellana Sports Complex sa Sawang-Calero, ning siyudad.

Ang friendly game kabahin sa nagpadayong Cebu City Hall Sportsfest Inter-Department basketball tournament 2011.

Sugdan ang duwa sa alas-7 sa gabii.

Ang LLBA ubos sa pagdumala ni Billy Nadado magsalig ni kanhi Cebu Central Colleges (CCC) nga karon University of Cebu (UC) Jack Soler. Mosuporta sab sila si Alan Yu, Archie Ompad, Danny Aying ug kanhi University of the Visayas (UV) Lancer Rene Toring.

Sa pikas bahin, ang Rama Boys magsandig sa ilang three-point artist Cebu City Mayor Michael Rama. (BANAT NEWS)