Athletics dominado ng Maynila; QC tankers lumangoy ng 15 gold

MANILA, Philippines - Ang mga pambato ng Maynila ang nanguna sa athle­tics, samantalang namayani naman ang mga tan­kers ng Quezon City sa swimming event ng National Capital Region qualifying leg ng Batang Pinoy 2011 sa University of Makati.

Inangkin ni Garry Santiago ang tatlong gintong me­dalya sa boys throwing events at iniuwi ni Stephanie Santiago ang dalawa sa tatlong ginto sa girls throwing event ng athletics.

Naghagis ang 14-an­yos na si Santiago ng 13.99 metro sa shot put boys bago idinagdag ang discus throw sa inihagis nitong 35.29m at ang javelin throw sa layong 47.74m.

Ang 13-anyos namang si Stephanie, walang ka­ugna­yan kay Santiago, ang namayagpag sa shot put girls sa layong 8.59m at idinagdag ang discus throw sa itinala nitong 25.32m.

Sumisid naman ang Quezon City ng 15 sa naka­ta­yang 22 ginto sa swimming event.

Sumungkit ng tatlong ginto ang15-anyos na si John Jeric Santos sa 200m medley relay kung saan niya nakasama sina Alberto Batungbacal, Jeremy Bryan Lim at Christian Limsui na nagtala ng 2:02.37.

Nanalo rin ang 3rd year high school sa Grace Chris­tian College na si Santos sa boys 14-15 50-meter freestyle (26.77) at 200-meter backstroke (1:05.90).

Nagsipag-uwi rin ng tiga­lawang ginto ang iba pang QC tankers na sina Jeremy Bryan Lim (boys 14-15 200m medley relay at 200m free), Alberto Batungbacal (boys 14-15 200m medley relay at 100m breast), Christian Edward Limsui (boys 14-15 200m medley relay at 50m fly) at Baron Joaquin Ong sa boys 12-13 200m free at 50m fly.

Nanalo rin ang City of Manila ng limang ginto mula kina Joleyrina Michaela Buna sa girls 14-15m free at 100m back,Jowan Clark De Veyra sa boys 12-13 100m breast, Maria Camille Cortey sa girls 14-15 100m breast at Joshua Yang sa boys 12-13 100m back.