5 RP Blu Girls pambato ng Rizal Province

MANILA, Philippines - Nagbunga ang pagpasok ng local government ng Rizal Province sa la­rangan ng sport matapos manalo ang wo­men’s softball team ng gintong medalya sa 26th SEA Games sa Indonesia.

Ang Rizal Province sa pangunguna ng Gobernador na si Casimiro “Jun” Yñares ang tumangkilik sa limang kasapi ng Blu Girls na winalis ang kompetisyon patungo sa ika-pitong titulo ng Pilipinas sa women’s softball sa regional games.

Sina Karen Paghubasan, Melanie La­serna, Veronica Bellaza, Joy Parilla at Mar­lyn Francisco ang mga tubong Rizal Pro­vince.

“Nagsimula ang limang ito sa mga ma­liliit na tournament at patuloy silang inaalagaan ni Gov. Yñares na nagbibigay ng kanilang food allowances. Hindi naman nasayang ang mga perang itinulong ng aming Gobernador dahil heto at kasapi si­la sa national team na nanalo muli ng gin­to sa SEA Games,” wika ni Atty. Rolly Rivera, pinuno ng legal department ng Rizal Province.

Inaasahang may mga citations na ipa­lalabas ang Rizal Province upang ki­lalanin ang naibigay na karangalan ng limang manlalaro na kabilang rin sa Ri­zal team na naglaro noong 2009 World Softball Series.

Nananalig si Rivera na patuloy na bu­buhos ang suporta ng pamahalaan ng Rizal sa sports lalo na sa softball ma­tapos ang tagumpay sa SEA Games.

Hinimok rin ni Rivera, ang dating pa­­ngulo ng ASA-Phil na ngayon ay Exe­cutive Vice President ng nakaupong pa­­ngulo na si Jean Henri Lhuillier, ang iba pang local government units na magsi­mu­lang tumulong sa sports development upang umangat na ang sport sa bansa.

“Maraming atleta pero kulang sa su­porta. Kung lahat ng mga LGUs ay mag­lalaan ng pondo para sa sports, walang du­da na maipapakita ng atletang Pinoy na sila ay mga world class athletes,” dag­dag pa ni Rivera.