SHS-Ateneo milampos pagdepensa sa ilang korona

CEBU, Philippines - Milampos ang Sacred Heart School-Ateneo de Cebu (SHS-AdC) Magis Eagles pagdepensa sa ilang korona ug gawas pa niini, mikulit sab kini og repeat sa ilang national championship sa   Passerelle division sa Milo-BEST SBP Passerelle Twin Tournaments 2011.

Ang Magis Eagles milubong sa Holy Child School of Davao sa iskor nga 65-43 sa miaging adlaw didto sa Jacinto Tiu Competition Court sa Xavier School sa San Juan, Metro Manila.

Bugnaw ang pagsugod sa Magis Eagles, apan dihang nakakuha na sila’g momentum, hingpit na nilang gikontrolar ang duwa aron mokulit og makasaysayanong back-to-back championship.

Sila si Jair Igna ug Jarek Mercado nagkumboya og 16 puntos sa second period aron hatagan ang Magis Eagles og sayes puntos nga bentaha, 34-28 sa halftime.

Ang Magis Eagles padayong mikontrolar sa duwa pinaagi nilang Janjan Jaboneta ug Laeil Medalle. Silang Jaboneta ug Medalle nagkumboya og 13 puntos aron inaton ang ilang labaw ngadto sa 19 puntos, 53-34 paingon sa final period.

Si Jaboneta miposte og 11 puntos aron pangulohan ang SHS-Ateneo, samtang si Medalle mi-iskor og 10 puntos.

 Ang pilderong Holy Child gipangulohan sab ni Kent Fernandez pinaagi sa iyang nuybe puntos.

Sa Small Basketeers Philippines (SBP) finals, ang Lourdes School of Mandaluyong (LSM) maoy milangkat sa korona human ilang gidemolis ang Ateneo de Davao University sa iskor nga 76-36.

PUNTOS MATAG USA

SHS-AdC (65) - Jaboneta 11, Medalle 10, Igna 10, Yu 7, Senining 7, Mercado 6, Catan 4, Ochea 3, Competente 3, Cabarrubias 2, Lee 2

Holy Child (53) - Fernandez 9, Castaneda 8, Roxas 7, Aguanta 5, Ibanez 5, Rodriguez 3, Danganon 3, Dalogdog 2, Lim 2, Maruya 2  (BANAT SPORTS)