19 Bisdaks napiling "MOA"

CEBU, Philippines - Napulo'g siyam (19) ka mga sakop sa Team Visayas nga nailang "Bisdaks" ang napiling Most Outstanding Athletes (MOA) sa pagtapos sa 3rd Milo Little Olympics National Finals sa miaging adlaw didto sa Narciso Ramos Sports and Civic Center sa Lingayen, Pangasinan.

Usa na niini si Gretchel Soltones, sakop sa Pajo National High School (PNHS) women's volleyball team nga nidaog og gold ning maong multi-sport event.

Si Soltones, kinsa gikan sa buwag nga pamilya, mipahinungod sa iyang award ngadto sa iyang amahan, usa ka security guard.

Dili kini ang unang national award ni Soltones kay napasidunggan na siya isip Most Valuable Player (MVP) atol sa Palarong Pambansa didto sa Palawan duha na ka tuig ang milabay dihang nagduwa pa siya sa Catmon Elementary School.

Uban ni Soltones sa volleyball event mao sila si Gwyndharell Guy sa Colegio del Sto. Niño ug Willamae Ortega sa Catmon ES ug Kevin Labay sa Abellana National School.

Nakadawat sab og award sila si Glen Thomas Ramos ug Valentino Calvo sa Don Bosco Technology Center sa football event, Chelsea Canizares, Victor John Libradilla, Nathalie Cabaluna ug Derold Nick Dampios sa University of San Jose-Recoletos sa scrabble. Arthur Craig Pantino ug Fritz Satera sa University of San Carlos ug Allyssa Mae Bornia sa Bright Academy sa lawn tennis.

Mikompleto sa MOA awardees mao sila si Dannel Jay Tormis sa University of Cebu ug Sherlyn Love Gabisay sa Severo Duterte Memorial Elementary School sa table tennis, Ryan Jay Doromal ug Tricia Merced Opon sa Banilad Elementary School sa badminton, Ronald Navarro sa Catmon Elementary School sa sipa ug Roy Villahermosa sa University of Cebu sa athletics. (BANAT SPORTS)