Alvarez labing unang kampiyon

CEBU, Philippines - Dakung kalampusan ang naangkon ni Bayani Alvarez human siya nahimong labing unang kampiyon sa labing daku nga ultra-marathon sa Sugbu, ang Century Properties 100-km Ultramarathon kagahapon nga didto nanukad sa Bogo paingon sa dakbayan sa Sugbu.

Si Alvarez nga kawani sa ABS-CBN ug kampiyon sa Press Freedom Run 2011 niadtong Septiyembre, mipilde sa kapin 100 ka beteranong ultra-marathoners nga misalmot sa lumba.

Gitapos niya ang kutas kaayong lumba sud sa 11 ka oras ug sayes minutos. Nagsunod si Enrique Mangas sa oras nga 11:40.45, samtang si Noel Tillor nga mi-oras og 11:58.07 maoy miangkon sa ikatulong dapit.

Si Kenji Yoshioka sa Japan, mipahiluna sa ikaupat sa oras nga 12:05.

Sa laing bahin, si race director Raffy Uytiepo mitug-an nga sa 160 ka mga partisipante, pito lang ka runners ang pakyas pag-abot sa 9-hour cut-off didto sa Catmon.  (BANAT SPORTS)