CEBU, Philippines - Mihayag dayon ang paglaum sa Sacred Heart School-Ateneo de Cebu (SHS-AdC) Magis Eagles sa ilang kampanya pagdepensa sa ilang korona sa national Passerelle championship human mokulit og 69-58 nga kadaugan batok sa ilang igsuong koponan Xavier School of San Juan pagbukas sa Milo-BEST SBP Passerelle Twin Tournament 2011 kagahapon didto sa Jacinto Tiu Competition Court sa Xavier School.
Wala pa kaayo motusik ang Magis Eagles ug daw pinugngan ang ilang duwa hinungdan nga nabiyaan kini sa sayong bahin sa first period, 0-7. Hinuon nakan-an ang labaw ngadto na lang sa tres puntos paghuman sa maong kuwarter, 10-13.
Sa kanipis sa labaw, daling nakuha sa Magis Eagles ang momentum sa kombinasyon nilang Jair Igna, Jarek Mercado ug Bro Catan aron moposte og 37-22 sa halftime.
Napahakan sa Xavier ang labaw ngadto sa siyete puntos 42-49 pinaagi sa triple ni Lim. Mibawos sab dayon ang SHS-Ateneo pinaagi sa ilang 10-2 run aron inaton og balik ang labaw ngadto sa 15 puntos, 59-44 paingon sa final period.
Gitapos ni Rendell Senining ang duwa pinaagi sa pagpasulod sa upat niya ka sunod-sunod nga free throws.
Si Catan maoy nangu sa Magis Eagles sa iyang 10 puntos, samtang silang Mercado ug Senining midugang og nuybe puntos matag usa.
Si Lim mibahog og 15 puntos aron pangulohan ang Xavier.
Ang SHS-AdC makigtakus batok sa Guagua National Colleges (GNC) ug sa higayon nga modaog kini, daku ang ilang purohan nga mobalik sila sa finals.
Sa SBP division, ang NCR champion Lourdes School of Mandaluyong milubong sa Ateneo de Davao sa iskor nga 74-27. (BANAT SPORTS)