Brgy. Pajo/Lapu-Lapu City kampiyon na sa Handy Fix

CEBU, Philippines -  Kakugi ug determinasyon maoy gihimong hinagiban sa Brgy. Pajo sa Lapu-Lapu City pagpukan sa Mindanao champion Brgy. Agdao sa Davao City, 92-84 aron ugkaton ang national title sa 2011 National Handy Fix Super League National Barangay Championship niadtong Domingo didto sa Capitol Parish gym sa dalan Escario, siyudad sa Sugbu.

Ang Brgy. Pajo nga gipaluyohan sa Rollway Customs Brokerage ni Rolly dela Pieza, miabante sa finals dihang ilang gipalagpot ang Manila champion Brgy. Bagumbayan sa Taguig City atol sa ilang knockout semifinals niadtong Sabado.

Ang kanhi UV Green Lancer nga si Harlow Chad Villanil, anak ni ex-pro Larry Villanil maoy napiling National Finals MVP.

Nag-agi una’g 11 ka lead changes ug tulo ka deadlocks ang Brgy. Pajo sa wala pa nila palayasa ang taga-barangay Agdao.

Ang Brgy. Pajo nabiyaan og dos puntos sa first period ug gumikan sa kamabaw sa labaw, dali nilang nailog ang momentum ug mao na ang miabante sa halftime, 40-35.

Mihulga sa pipila ka higayon ang Brgy. Agdao sa giya sa ilang topgunner Rhandelle Colina, apan wala mosalir ang ilang pangatake kay gitugbangan kini sa hugot nga depensa sa Brgy. Pajo.

Lima ka players sa Brgy. Pajo nilang coach Chucky Caro ug Edwin Amistad ang mikadlit og double figures.

Gipangulohan kini ni Allan Sala, kinsa mikimada og 21 puntos, gisundan ni Vincent Mingueto sa iyang 17 puntos. Sila si Villanil ug Miguel Tabaloc mitikdol og 15 puntos matag usa ug si Gil Wagas mitimang og 11 puntos.

Samtang ang pilderong Brgy. Agdao gipangulohan ni Colina, kinsa miburak og 26 puntos. Miabag sab sa opensa silang Mark Anthony Abillero ug Janno Nuñez nga miamot og 22 ug 10 puntos matag usa.

Sa laing bahin, gipahibalo ni tournament commissioner Darren Evangelista nga ang second conference nga gilaumang salmotan og 250 ka teams lukop nasud ang himuon sa Pebrero sunod tuig.

Puntos matag usa

Pajo/Lapu-Lapu (92) - Sala 21, Mingueto 17, Villanil 15, Wagas 11, Tarona 9, Arong 6, Solis 6, Tabaloc 6, Lomongod 2

Agdao/Davao (84) - Colina 26, Abillero 22, Nuñez 10, Moreno 6, Palarca 6, Cañete 5, Buatan 4, de la Peña 1 (BANAT NEWS)