Dagupan city host sa NSBC

CEBU, Philippines -  Ang Dagupan City maoy mo-host sa 64th National Students Basketball Championships (NSBC) didto sa Dagupan City Sports Complex sa Pebrero sunod tuig.

Kini ang gipahibalo ni Basketball Association of the Philippines (BAP) secretary-general Graham C. Lim atol sa iyang pagbisita dinhi sa Sugbu dili pa dugay.

Ang maong kalamboan gihangop kini sa opisyales sa Region 1 ubos sa pagpangulo ni BAP Region 1 director ug Dagupan City Mayor Bebe Fernandez.

Si Sen. Antonio V. Trillanes 1V, ang presidente sa BAP nga bag-o lang sab mibisita didto sa Dagupan City alang sa ocular inspection miingon nga iyang nakita nga interesado sab kaayo ang maong rehiyon nga mo-host sa NSBC.

Ang bag-ong kampiyon ug back-to-back title holder sa Cebu Schools Athletic Foundation, Inc. (CESAFI) University of Cebu (UC) Webmasters nga gipangulohan sa ilang two-time MVP ug 6-foot-9 Junemar Fajardo, maoy morepresentar sa Region 7 ngadto sa NSBC. Sila sab ang defending champions atol sa 63rd edition didto sa Butuan City duha na ka tuig ang milabay.

MCWD, 2-0 na sa ARENA-7 cagefest

Gilumsan sa MCWD-Team B ang Bureau of Customs (BOC), 81-60 sa Association of Regional Executives in National Agencies (ARENA-7) basketball tournament didto sa Sacred Heart School gym sa Gen. Maxilom Ave., ning siyudad.

Sa maong kadaugan, ang MCWD miposte og 2-0 nga baraha, samtang ang BOC nagbitbit og 1-1 nga baraha.

Wala kapugngi ang pagmangtas sa MCWD ginamit ang walay puas nga fastbreak aron kontrolahon ang duwa.

Ang MCWD ubos ni skipper Army Marata, gipangulohan ni Melvin Paz, kinsa miposa og 23 puntos samtang si Lucero Gako midugang og 18 puntos.

Ang BOC ni coach Gilbert Demape gipangulohan nilang Mactan Collector Bingo Matugas ug Customs Police Jingjing Rama nga mi-iskor og nuybe puntos matag usa.

PUNTOS MATAG USA

MCWD (81) - Paz 23, Gako 18, Marata 16, Umacob 6, Abatayo 5, Hindayan 5, Ebrado 4, Mission 3, Jumao-as 2, Basengo 2, Nicanor 2

BOC (60) - Matugas 9, Rama 9, Cañete 8, Mose 8, Mabalo 6, Laraga 5, Capalan 4, Monteño 3, Velez 2, Dela Cruz 2. 

IBP-red kaging batok picpa

Gipakuratan sa Philippine Institute of Certified Public Accountants (PICPA) quintet ni skipper Yoli Meso ang Integrated Bar of the Philippines (IBP)-Red pinaagi sa pag-iskor og 85-73 nga kadaugan kaniadtong Miyerkules sa gabii aron makigtabla sa ilang biktima sa 1-1 nga baraha sa nagpadayong 2011 Wednesday Club Christmas basketball tournament didto sa Capitol Parish gym sa dan Escario, ning dakbayan.

Sikit ang nahimong duwa dihang igo lang milabaw ang PICPA og singko puntos, 17-12 human sa first period ug nasakmit sab sa IBP-Red ang liderato dihang misukli sila’g 20-14 scoring run aron molabaw sa halftime, 40-37.

Silang Lito Ortiz ug Fred Yu maoy nagpunay og pamuntos sa first period apan gitugbangan sila sa mainit nga tandem nilang Benjo Macion ug Al Lagahit kinsa maoy nangu sa opensa sa IBP-Red diin mipabuhagay sila’g 28-20 nga rally.

Misamot pa gyud kainit ang IBP didto sa third period aron inaton ang ilang labaw ngadto sa nuybe puntos, 60-51 apan ila kining giusikan tungod sa ilang mga turn overs ug daghang sipyat nga tirada.

Gipahimuslan kini sa PICPA kinsa mipahugot sab sa ilang depensa ug nagmangtas kini didto sa fourth period ginamit ang 34-13 nga scoring run nga gipasiugdahan sa managsoong Bonsucan—Arjam ug Jacon kinsa maoy responsable sa pagselyado sa ilang 12 puntos nga kadaugan.

Si Jacon ug Arjam mibahug og 18 ug 16 puntos matag usa ug gi-abagan sila nilang Ortiz ug Alfen Yu kinsa nagkumboya og 27 puntos ug si Meso midugang sab og double figures sa iyang 12 puntos.

Laing teammate nga miposa og double figure mao si Fred Yu kinsa miabuno og 10 puntos.

Silang Lagahit ug Macion maoy nangu sa IBP-Red human sila mohakot og 22 ug 21 puntos, matag usa.

Puntos matag usa:

PICPA (85)- J. Bonsucan 18, A. Bonsucan 16, Ortiz 14, A. Yu 13, Meso 12, F. Yu 10, Salubre 2.

IBP-Red (73)- Lagahit 22, Macion 21, Velez 11, Liston 9, Capahi 6, Geotina 4 .

Sky Blue-MS Motosuit kampiyon na sa LABA

Ang Sky Blue-MS Motosuit ni team owner Lou Ornopia mipukan sa Green-Ronel Trucking, 87-77 magpabiling hari sa Los Amigos Basketball Association (LABA) 2nd Conference Christmas Basketball Tournament didto sa Banilad Sports Center sa AS Fortuna, Mandaue City.

Ang Sky Blue nga maoy nikontrolar sa kinatibuk-ang duwa, gipangulohan ni Donald Diaz, kinsa miburak og 20 puntos, apan si Doming Recto maoy miangkon sa MVP award. Si Recto mibugha og 18 puntos, gisundan ni Merot Ygoña nga adunay 14 puntos.

Si Dodoy Rizane, mao sab ang nangu sa Green pinaagi sa iyang 29 puntos, samtang si Lindsay Bontilao miabuno og 15 puntos.

Si Mandaue City Vice Mayor Glen O. Bercede, kinsa usa sa mga founders sa LABA, maoy mitunol sa championship trophy ngadto sa Sky Blue.

PUNTOS MATAG USA

Sky Blue-Motosuit (87) - Diaz 20, Recto 18, Ygoña 14, Unabia 8, Monterroyo 7, Ornopia 6, Jacalan 3, Russell 3, Ople 1

Green-Ronel Trucking (77) - Rizane 29, Bontilao 15, Orendain 7, Yatan 7, Pañe 6, Opone 5, Abayon 4, Lipon 2, Cabucos 2 (BANAT NEWS)