Opinyon sa ALA fighters nabahin

CEBU, Philippines -  Wa magkatakdo ang opinyon sa mga ALA Gym fighters kabahin sa resulta sa Manny Pacquiao-Juan Manuel Marquez showdown kagahapon didto MGM Grand Garden Arena sa Las Vegas .

Si Pacquiao midaog pinaagi sa usa ka kontrobersiyal nga 12-round majority draw decision batok ni Marquez dihang tulo ka mga hurado ang miiskor og 116-112 ug115-113 pabor sa Pinoy boxing superstar, samtang usa ka judge ang mihatag og 114-all.

Bisan pa sa kasikit sa resulta sa sangka sa duha, si two-division world champion Donnie “Ahas” Nietes nagkanayon nga klaro kaayo nga si Pacquiao ang midaog tungod usab sa abilidad sa Pinoy boxing superstar ug sa kadaghan sa kumo nga gibato niini.

“Klaro gyud si Pacquiao nidaog bisan og naglisud gamay pero sakto ra gyud ang desisyon sa resulta sa away,” matud pa ni Nietes dihang nahinabi ning tigbalita didto sa Radisson Blu Hotel.

Wala usab nagduda si Rey “Boom Boom” Bautista sa kapabilidad ni Pacquiao nga mudaog sa ilang trilogy ni Marquez, apan ang Boholano knockout artist nagkanayon nga posibling aduna pay mahitabong laing rematch tali sa duha.

Apan sa iyang bahin, ang undefeated flyweight nga si Milan “El Metodico” Melindo midapig ni Marquez nga mao unta ang angay mudaog sa away.

“Ang gitan-aw nila ang kadaghan sa kumo nga gilabay ni Pacquiao, pero mas klaro ang igo ni Marquez, mas accurate siya,” segun pa ni Melindo.

2 Pinoy daog sa undercard

Gawas ni Manny Pacquiao, mihatag usab og dungog sa nasud sila si Fernando Lumacad ug Dennis Laurente kinsa midaog sa tagsa-tagsa nila ka sangka sa undercard kagahapon didto sa MGM Arena sa Las Vegas .

Ang super flyweight nga taga-General Santos City nga si Lumacad midaog pinaagi sa unanimous decision batok ni Joseph Rios sa ilang eight-round bout.

Human mapatumba si Rios sa ikaduha ug ikalimang round, si Lumacad miangkon sa 77-73, 77-74 ug 78-72 score sa mga hurado.

Sa iyang bahin ang beteranong welterweight nga si Laurente mipahayang ni Ayi Bruce sa 7th round.

Si Lumacad mopalambo sa iyang record ngadto sa 25-3-3, 12KOs, samtang si Laurente misaka sa 41-4, 22KOs. (BANAT NEWS)