CEBU, Philippines - Gipakuratan sa barangay Agdao sa Davao City ang Brgy. Dumlog sa Talisay City pinaagi sa paglubong, 96-78 aron mo-abante sa championship round sa 2011 Handy Fix Super League National Barangay Championship National Finals kagahapon didto sa Capitol Parish gym sa dalan Escario, ning siyudad.
Ning pagsuwat, ang barangay Pajo sa Lapu-Lapu City nag-atubang sab og bug-at kaayong tahas nga padayon pang nakigsangka batok sa Brgy. Bagumbayan sa Taguig City sa ilang knockout game.
Ganado kaayo ang Agdao nga nagpakita sa ilang katakus sa pagpangulo ni Rhandelle Colina, kinsa mikulit og 31 puntos, lakip na ang lima ka triples.
Migukod unta ang Dumlog human sa nagsunod-sunod nga puntos ni kanhi USPF Panther Jordan Bardillas sa iskor nga 28-32, apan ang ilang huyang nga depensa mao ra sab ang nakapilde nila.
Si Bardillas miposa og 14 puntos, apan si UV Lancers Arvie Cabañero maoy topscorer pinaagi sa iyang 15 puntos. Sama ni Bardillas, si ex-USJR Jaguar Jemar dela Peña mi-iskor sab og 14 puntos.
Ang torneyo gipasiugdahan sa Magna Prime Distribution Corp. ug gidumala sa Evangelista Aquatics & Sports Management Inc. (EASMII)
PUNTOS MATAG USA
Agdao-Davao (96) - Colina 31, Nuñez 18, Cullados 8, Buaton 8, Pularca 8, Cañete 6, de la Peña 5, Moreno 4, Abillero 3, Patulot 3, Melgaso 2
Dumlog-Talisay (78) - Cabañero 15, de la Peña 14, Bardillas 14, Obeso 9, Tabay 7, Racaza 6, Bibiera 5, Labati 4, Hernando 2 (BANAT SPORTS)