Saymer Merchandise milubong sa Zepra

CEBU, Philippines - Pwerteng bangisa nga nakaduwa ang Saymer Merchandise ni team owner Christopher Sayson hinungdan nga mipaksit kini og daog batok sa Zepra, 96-88 sa Basak Barangay Council Fiesta Basketball Tournament niadtong Miyerkules didto sa Basak gym sa Lapu-Lapu City.

Mipabuhagay dayon og mga puntos ang Saymer pagsugod aron motali og 12 puntos nga labaw, 23-11 paghuman sa unang 10 minutos sa duwa. Apan kalit nga mikagar ang ilang mga tirada sa ikaduhang kuwarter nga nakahatag og higayon sa Zepra pagkitkit sa labaw ngadto na lang sa singko puntos, 45-40 sa halftime.

Milagsik og balik ang Saymer sa pagpangulo ni Danny Enario aron bingaton pag-usab ang ilang labaw, 73-57 nga maoy nakapawong sa paglaum sa Zepra.

Si Enario mikadlit og 25 puntos, si Bryan Canoy mihabwa og 13 puntos, samtang sila si Ryan Villomo ug Booc miariya og 12 puntos matag usa.

Ang naparot nga Zepra gipangulohan ni Ferdinand Lopez pinaagi sa iyang 17 puntos, gisundan ni Ritche Cesa nga adunay 13 puntos ug Manuel Ponce nga mikimada og 12 puntos.

Namugna ang torneyo pinaagi sa mga paningkamot ni Basak Brgy. Capt. Belong Darnayla uban sa suporta sa Barangay Council ug Roger Bergado.

PUNTOS MATAG USA

SAYMER (96) - Enario 25, Canoy 13, Villomo 12, Booc 12, Daño 11, Martil 11, Lucas 5, Cañete 4, Sayson 4, Ngujo 2

ZEPRA (88) - Lopez 17, Cesa 13, Ponce 12, Coming 7, Katada 7, Pitogo 7 Eusan 7, Matondo 6, Albrando 4, Torralba 3, Amistoso 2   - (BANAT NEWS)