Batang Pinoy sugod na

MANILA, Philippines - Gatosan ka mga batan-ong atleta gikan sa tunga-tungang Kabisay-an ang mag-abot karon sa pormal nga pagbukas sa Batang Pinoy Games Regional Finals didto sa Gov. Mariano Perdices Sports Complex sa Dumaguete City.

Ang Team Cebu City (TCC) mopadala og kapin sa 100 ka atleta ning maong multi-sport event.

Ang mga atleta gihagpat basi sa ilang performance atol sa Milo Little Olympics ug sa Cebu City Olympics.

Katapusang niapil ang TCC sa Batang Pinoy niadto pang 2004 didto sa Palawan diin mipuwesto sila sa ikaupat nga dapit sa overall.

Ang TCC motigi lang sa archery, badminton, table tennis, lawn tennis, boxing, 3-on-3 basketball, judo, weightlifting, athletics ug taekwondo.

Ang mga modaog ning usa ka semana nga athletic meet maoy morepresentar sa rehiyon sa Batang Pinoy National Games nga gikatakda sa Disyembre 10-14 didto sa Naga, Camarines Sur. (BANAT NEWS)