UV, SHS-AdC magtiwas

CEBU, Philippines - Buot bawion sa topseed University of the Visayas (UV) Baby Lancers ang ilang korona nga katapusan nilang gihuptan niadtong 2008 season, samtang ang Sacred Heart School-Ateneo de Cebu (SHS-AdC) Magis Eagles mosuway sab pagsakmit sa labing una nilang titulo sa dihang magtiwas kini sa deciding Game-5 sa ilang "best-of-five" finals series sa 11th Cebu Schools Athletic Foundation Inc. (CESAFI) basketball season karong adlawa diha sa Cebu Coliseum.

Nagpakita sa ilang kaandam ang Magis Eagles dihang ilang giunhan ang   Baby Lancers pinaagi sa usa ka impresibong 94-82 kadaugan atol sa Game 1 niadtong Oktubre 29. Apan ang Baby Lancers nagmangtas ug ilang gilubong ang Magis Eagles sa Game-2 sa iskor nga 81-56 aron tablahon ang series, 1-1. 

Nakabentaha pag-usab ang Magis Eagles human nila maangkon ang Game-3 pinaagi sa pag-iskor og 73-69 nga kadaugan ug nagkinahanglan na lang unta sila og usa ka daog aron sakmiton ang korona. Apan nabawsan sab sila sa Baby Lancers sa Game-4 sa iskor nga 65-60 aron tablahon na sab ang series, 2-2 nga nakapugos og rubbermatch.

Sa miaging tuig, ang Baby Lancers wala makasulod sa finals nga maoy naghatag og higayon sa Cebu Eastern College (CEC) Dragons pagkulit og school record dihang ilang gisakmit ang korona pinaagi sa pagharos sa Magis   Eagles, 3-0 sa ilang "best-of-five" finals.

   Sila si Andres Paul Desiderio ug Nelson Peralta maoy duha sa labing sinaligan sa Baby Lancers ubos ni coach Delfin Pepito Jr. Gipaabot sab nga mosuporta silang Ron Marvin Dennison, Dexter Lucero, Reeve Ugsang, Matthew Oche ug Lendyl Undaloc.

Samtang ang Magis Eagles ni coach Ramil Rasmo maglaum sa abilidad   nilang Henric Dawn Ochea, Julius Cadavis, Aaron Sing, Jari Igna, Maverick Suarez, Patrick Go ug Dave Yu.  (BANAT NEWS)