Rambol sa Mandaue public market

CEBU, Philippines - Laing kulbahinam nga aksiyon ibabaw sa ring ang masaksihan sa pag-ulbo sa 3rd Mayor Jonas C. Cortes Cup Amateur Boxing Series karong adlawa didto sa New Mandaue Public Market rooftop.

Mobida sa maong fight card nga gipasiugdahan sa ALA Promotions ug Mandaue City government mao ang sangka sa duha ka amateur sensations gikan sa Bacolod nga sila si Rey Morales ug JP Artieda.

Lain pang taga-Negros fighter nga si Juren Labordo makigsinukliay og kumo ni JK Gako sa Boljoon, Cebu.

Magbinukbukay usab ang duha ka out-of-town fighters nga sila si Rolando Lingao-lingao sa Bukidnon batok ni John Ivor Lastrilla sa Tacloban, samtang si Ralph Lulu sa Sultan Kudarat makigsangka ni Melvin Besinga sa University of the Visayas (UV).

Si Elmo Traya mopakita sa iyang abilidad batok ni Mardie Muaña, si Kevin Catajara sa Talamban makigsukmagay    ni Mart Sorero ug si Arnold Quebido makigsangka ni Patrick Gullane.

Mokompleto sa fight card mao ang sangka nila ni Rommel Tuñacao batok Ramil Casañares, Raymond Tarona batok Jose Groval, BB Rama batok Jomar Caspe, Raymond Rama batok John Lloyd Transporte ug Franklin Rotilles batok Jun Nuñez. (BANAT SPORTS)