UV nakatabla na sab

CEBU, Philippines - Nalugwayan pa ang kinabuhi sa University of the Visayas (UV)  Baby Lancers human maka-eskapo bitbit ang 65-60 nga kadaugan batok sa Sacred Heart School-Ateneo de Cebu (SHS-AdC) Magis Eagles aron pagpugos ngadto sa "do-or-die" game sa ilang "best-of-five" finals series sa junior division sa 11th Cebu Schools Athletic Foundation Inc. (CESAFI) basketball event kagabii didto sa Cebu Coliseum.

Ang Game-5 himuon karong Martes diha gihapon sa Cebu Coliseum.

Naprotektahan sa Baby Lancers ang ilang 11 puntos nga labaw, 52-41 sa tunga-tungang bahin sa duwa ug wala na sila molingi pa sukad niadto bisan pa sa mga panghulga sa Magis Eagles sud sa pipila ka higayon.

Ang unom ka sunod-sunod nga puntos ni Nelson Peralta maoy mitukmod sa Baby Lancers aron moabante na sab og 11 puntos, 58-47 sa katapusang tres minutos sa regulasyon.

Apan ang Magis Eagles milusad og 12-2 nga rally, walo niini gikan ni Henric Dawn Ochea, apan didto ra kutob ang ilang mga paningkamot kay sila si Ron Marvis Dennison ug Andres Paul Desiderio abtik kaayong miluwas sa Baby Lancers pinaagi sa paglansang sa katapusang otso puntos.

Si Desiderio maoy topscorer sa Baby Lancers sa iyang 18 puntos, sila si Peralta ug Dexter Lucero adunay tag 11 puntos.

Gipangulohan ni Ochea ang nabuntog nga Magis Eagles pinaagi sa iyang 18 puntos, gisundan ni Julius Cadavis nga adunay 10 puntos. Ang ilang sinaligan nga si Jari Igna igo lang mi-iskor og tres puntos. Mao sab sila Patrick Go, Maverick Suarez ug Dave Yu nga wala kaayo nakapuntos tungod sa solidong depensa sa Baby Lancers. (BANAT SPORTS)