CEBU, Philippines - Gipakuratan sa Philippine Institute of Certified Public Accountants (PICPA) ni skipper Yoli Meso ang Integrated Bar of the Philippines (IBP)-Red pinaagi sa pag-iskor og 85-73 nga kadaugan sa 2011 Wednesday Club Christmas basketball tournament niadtong Miyerkules sa gabii didto sa Capitol Parish gym sa dalan Escario, ning siyudad.
Sikit kaayo ang duwa diin igo lang milabaw ang PICPA og singko puntos, 17-12 paghuman sa first period, apan ang IBP-Red milusad og 20-14 run aron mo-abante og tres puntos sa halftime, 40-37.
Silang Lito Ortiz ug Fred Yu maoy nagpunay og pamuntos sa first period, apan gitugbangan sila sa tandem nilang Benjo Macion ug Al Lagahit nga maoy nangu sa opensa sa IBP-Red.
Misamot pa gyud kainit ang IBP didto sa third period aron inaton ang ilang labaw ngadto sa nuybe puntos, 60-51, apan ila kining giusikan tungod kay nakahimo kini'g mga turnovers ug mikagar ang ilang mga tirada.
Ang managsuong Bonsucan nga sila si Arjam ug Jacon maoy responsable sa 12 puntos nga kadaugan sa PICPA.
Si Jacon ug Arjam mibahog og 18 ug 16 puntos matag usa, miabag sab silang Ortiz ug Alfen Yu nga nagkumboya og 27 puntos.
Silang Lagahit ug Macion maoy nangu sa IBP-Red nga nagkumboya og 43 puntos. (BANAT SPORTS)