Cobras buhi pa

CEBU, Philippines - Nakaginhawa pa ang Southwestern University (SWU) Cobras dihang mibawos kini ngadto sa University of Cebu (UC) Webmasters pinaagi sa paglubong og 40 puntos, 95-57 sa Game-3 sa ilang "best-of-five" finals series sa 11th Cebu Schools Athletics Foundation, Inc. (CESAFI) sa miaging gabii didto sa Cebu Coliseum.

MGA DUWA KARON

(Cebu Coliseum)

5:15 pm (juniors finals)

SHS-AdC vs. UV

6:45 pm (seniors finals)

UC vs. SWU

Bisan pa sa ilang pilde, nakabentaha gihapon ang Webmasters sa series, 2-1 ug aduna pay higayon nga langkaton nila karon ang titulo.

Daw naghuramentado si Eleazar Armecin didto sa third period ug halos walay sipyat ang iyang mga tirada aron pangulohan ang Cobras. 

Gawas kang Armecin, laing upat ka Cobras ang mibugwak og double figures. Si Rene Pacquiao milansang og 19 puntos, gisundan ni Justin Aboude nga adunay 15 puntos, si Bonifacio Guillena miamot og 14 puntos ug si Joseph Nalos mitampo og 10 puntos.

Gidominar sa Cobras ang duwa ug didto lang sila mabiyai sa first period, apan human nila nailog ang labaw, sila na ang nagkontrolar sa duwa.

Na-outscore sa Cobras ang Webmasters gikan sa second period hangtod na sa katapusang 2:13 sa duwa.

Ngil-ad kaayong nakaduwa ang Webmasters ug gani ang ilang mga sinaligan wala makahimo'g double figures gawas lang nilang Junemar Fajardo ug Jan Michael Auditor nga mihimo 19 ug 12 puntos matag usa.  (BANAT SPORTS)