UC Webmasters, 2-0 na

CEBU, Philippines - Nangayo pa og dugang singko minutos ang defending champion University of Cebu (UC) Webmasters una nila tumbaha ang Southwestern University (SWU) Cobras, 91-84 ug miposte na og 2-0 nga bentaha sa ilang "best-of-five" championship series sa 11th Cebu Schools Athletic Foundation Inc. (CESAFI) basketball event sa miaging gabii didto sa Cebu Coliseum.

Sayo unta nga maangkon sa Webmasters ang daog, apan si Francis Luigi Bercede misipyat og usa sa iyang mahinungdanong free throws nga mao unta ang maghatag kanila og daog. Bugtong nahimo ni Bercede mao ang pagtabla sa iskor, 75-all sa katapusang 9.5 segundos sa regulasyon.

Si Bercede, kinsa mihabwa og 15 puntos, nihatag og bag-ong paglaum sa Webmasters human sila mabiyai og singko puntos sa ikaduhang higayon, 75-70 kapin pa sa dos minutos ang nahabilin sa jumper ni Rene Pacquiao.

Ang Webmasters, kinsa milupig og pinuntosay sa Cobras sa overtime, 16-9 gipangulohan ni Junemar Fajardo, kinsa mikadlit og 23 puntos.

Wala kaayo magamit si Fajardo sa halos second period human makakubit og tulo ka fouls, apan ang nipuli niyang sentro nga si Alvin Labolabo maayo kaayong nakadepensa sa sentro sa Cobras nga si 6-foot-6 Justin Aboude, kinsa migradwit sa katapusang three minutos sa overtime diin nabiyaan sila og sayes puntos, 77-83.

Sukad niadto, medyo nahayagan na ang dalan sa Webmasters ug si Fajardo nga wala na kapugngi sa ilawom batok sa mugbong guwardiya. Gani si SWU coach Raul 'Yayoy' Alcoseba nakiglamano na ngadto ni Webmasters coach Roel Gomez sa katapusang 24.5 segundos.

Si Robinson Mohammad maoy naghatag og kasiguroan sa kadaugan sa Webmasters, 91-81 sa nahabiling 54 segundos ug mi-iskor og 17 puntos, samtang si Quinton Brian Heruela mihipos og 18 puntos.

Ang naparot nga Cobras gipangulohan ni Nalos, kinsa miburak og 26 puntos, si Pacquiao miabuno og 18 puntos, samtang si Aboude mikubit og 15 puntos.

Ang Game-3 himuon ugma diha gihapon sa Cebu Coliseum.

Puntos Matag Usa

UC (91) - Fajardo 23, Heruela 18, Mohammad 17, Bercede 15, Pao 7, Ampoon 5, Caytuna 4, Labolabo 2

SWU (84) - Nalos 26, Pacquiao 18, Aboude 15, Guillena 7, Armecin 5, Bregondo 4, Casquejo 4, Ortuyo 3 Halftime: 43-35 (BANAT NEWS)