Saulog nidominar sa 4th Keiz BJ Motors and Phoenix Cyclomax Titan moto-x

CEBU, Philippines - Nahibalik ang kamasidlakon ni Jovie Saulog nga kanhi niya gipakita kaniadto dihang iyang gidominar ang expert division sa 4th leg sa Keiz BJ Motors and Phoenix Cyclomax Titan Motocross Series sa miaging Domingo didto sa Caduawan racetrack sa Tabogon, amihanang bahin sa Sugbu.

Gipilde ni Saulog si Winsor Famorca aron sakmiton ang expert division title. Si Whelbert Maraño ni-okupar sa ikatulo.

Wala sab pabangbang ang anak ni Saulog nga si Jannelle, kinsa maoy nanghawod sa ladies special batok nilang RK Cuesta ug Noah Mangubat, kinsa nalandig sa ikaduha ug ikatulo nga dapit.

Ang managsuong Ornopia nga sila si Brylle ug Keizer, anak ni race organizer ug Keiz BJ Motors big boss Siegfred Ornopia nakakawat sab og atensiyon.

Si Brylle misakmit og duha ka championship trophies pinaagi sa mini class 85cc. ug sa beginners selection limited. Si Denmar Supatan mipahiluna sa ikaduha sa mini class 85cc., gisundan nilang Peewee Galia, RK Cuesta ug PJ Galia. Sila si Denmar Supatan, Jannelle Saulog, PJ Galia ug Peewee Galia maoy mikompleto sa top five finishers sa beginners selection limited.

Sa iyang bahin, si Keizer Ornopia nidominar sa peewee class human niya gipilde silang PJ Galia, Ken Ornopia, Froilan Tariman ug Harry Lauron.

Sila si Russel Gungob ug Nanding Pepito mihipos sab og duha ka titulo ning usa ka adlaw nga lumba.

Si Gungob naghari sa executive selection limited ug executive A division, samtang si Pepito sa executive B ug C category.

Si Dhong Batiquin maoy mipatigbabaw sa local enduro batok nilang Jun Quirol ug Alex Abalo, samtang si Rey Quirol midaog titulo sa beginners open production batok nilang Jougee Basco ug John Hisoler.

Si Basco nakabitbit sab og titulo dihang siya ang naghari sa habal-habal/wanggits category. Si Kent Limpag, mi-okupar sa ikaduha, gisundan nilang Sarge Espina, Ardita Lee, Romeo Alivio ug Kenneth Englis.

Sa laing bahin, si Tammy Largosa maoy misakiyo sa mini class 65cc. title. Si Ken Ornopia mitapos sa ikaduha, gisundan nilang RK Cuesta, Peewee Galia ug PJ Galia.

Sa peewee starter category, si Chello Aballe maoy nahimong kampiyon, gisundan nilang PJ Galia ug Froilan Tariman.

Gipasiugdahan sa Keiz BJ Motors ug sa Phoenix Cyclomax Titan, ang lumba giabagan sab sa Haojue Phils., Energy FM, RMO Motor Parts, Manang Lourdes Furniture, Edmung Pingkian, Geoffrey Viñalon ug Romy Ouano.  (BANAT SPORTS)