UC-SWU showdown

CEBU, Philippines - Pangulohan sa ilang 6-foot-9 center Junemar Fajardo, ang defending champion University of Cebu (UC) Webmasters mosugod na sa ilang kampanya pagdepensa sa ilang korona batok sa Southwestern University (SWU) Cobras sa Game-1 sa ilang "best-of-five" championship series sa 11th Cebu Schools Athletic Foundation Inc. (CESAFI) men's basketball tournament karong gabii diha sa Cebu Coliseum.

Aron makab-ot ang ilang misyon, kinahanglang dominahon ni Fajardo ang iyang kaatbang nga si 6-foot-6 Cameroonian center Justin Aboude, kinsa maoy responsable nganong ang Cobras nakasud sa finals sa labing unang higayon sukad sila niapil sa CESAFI walo na ka tuig ang nilabay.

Dili man tingali daku og bukton si Fajardo itandi ni Aboude, apan kun kasinatian maoy himuong sukaranan, ang reigning CESAFI MVP mas nakabentaha batok ni SWU slotman tungod kay ang higanteng taga-Pinamungajan, Cebu nakabagat na og mga higante sa laing dapit sa kalibotan ilabi na didto sa Hong Kong niadtong 2009 ug sa Shenzhen, China niadtong Agosto.

Dihang ilang gipalagpot ang nine-time champion University of the Visayas (UV) Green Lancers sa miaging season, si Fajardo maoy nahimong bayani human sa iyang winning basket gikan sa assist ni Quiton Brian Heruela.

Gawas kang Fajardo, ang Webmasters magsalig sab nilang Edward Pao, Robinson Mohammad, Francis Luigi Bercede, Jan Michael Auditor, Gerald Ampoon ug Heruela, samtang si Aboude suportahan sab nilang Eleazar Armecin, Bonifacio Guillena, Monbert Arong, Bernie Bregondo, Benito Ortuyo ug Joseph Nalos. 

Sa laing bahin, ang UV Lancers bisa'g wala ang ilang head coach nga si Felix Belano ug key players nga silang Rene June Saycon, Phil Mercader, Edrian Lao ug John Michael Abad, kinsa miserbisyo sa ilang usa ka duwa nga suspensiyon tungod sa kagubot sa ilang duwa batok sa SWU niadtong Martes, kinahanglan pa'g usa ka daog aron makuha nila ang ikatulong dapit human ilang gipilde ang University of San Carlos (USC) Warriors, 83-80. (BANAT SPORTS)