CEBU, Philippines - Kapin sa 8,000 runners dinhi sa nasud ug sa nagkalain-laing dapit sa kalibotan ang gipaabot modagan sa Cebu Marathon 2012 nga mosikad sa Enero 8 sunod tuig diha sa Asiatown I.T. Park sa barangay Apas, ning siyudad.
Sa miaging tuig, adunay 6,500 runners ang nisalmot lakip na niini ang mga langyaw'ng runners gikan sa 17 ka nasud, 300 gikan sa Manila ug kapin sa 100 gikan sa Visayas ug Mindanao.
"We are expecting that the number of participation will increase this year as we will also encourage students from the different colleges and universities to participate and we would like to attract more foreign runners and locals as well," matud pa ni Meyrick Jacalan sa Cebu Executive Runners Club (CERC) atol sa press conference kagahapon didto sa Active Zone sa Ayala Center-Cebu.
Ang usa sa labing dakung lumba sa nasud adunay tulo ka kategoriya ug kini mao ang 42K full-marathon, 21K ug 5K fun run.
Ang registration nagkantidad og P500 sa 5K, P700 sa 21K ug P1,000 sa 42K alang niadtong runners nga magparehistro sa dili pa ang Nobiyembre 20, samtang ang magparehistro gikan sa Nobiyembre 21 hangtod sa Disyembre 15 mobayad na'g P600, P900 ug P1,200 sa tulo ka kategoriya.
Sa maong registration, libre na niini ang limited edition New Balance singlet, finisher's medal alang sa tanang 42K runners, timing chip gikan sa Sprint Race Timers, race bib, post-race refreshments, post-race massage (21K ug 42K runners), finisher's loot bag, product sampling, giveaways gikan sa mga sponsors ug may kahigayonan pa nga modaog og raffle human sa lumba. (BANAT SPORTS)