CEBU, Philippines - Kapin sa 5,000 running enthusiasts ang gilaumang mosalmot sa final leg sa 2011 Run United Regional Series karong Disyembre 18 diha sa Asiatown IT Park sa barangay Apas, ning siyudad.
Ang lumba nga gipasiugdahan sa Unilab gisugdan niadtong Agosto 14 didto sa Davao City, gisundan sa Ilo-ilo, Bacolod, Manila, Cagayan de Oro ug Baguio City.
"Unilab is dedicated in promoting health that’s why we decided to organize sports that can help promote a healthy lifestyle. We also aim to encourage Filipino families to engage into active and healthy lifestyle," matud pa ni Unilab Sports Events executive Lester Castillo atol sa press conference kagahapon didto sa Grand Convention Center.
Ang mga entrante mahimo nga modagan sa 21K half-marathon, 10K, 5K, 3K ug 500m kiddie dash.
Gawas sa running, ang Unilab naglaraw nga mopasiugda sab og cycling ug triathlon events dinhi sa Sugbu sa sunod tuig.
Ganting salapi ang nagpaabot sa top three finishers sa matag kategoriya. Ang tanang 21K finishers makadawat og finisher shirt ug specially-designed medal.
Ang registration fee nagkantidad og P500 sa 21K, P400 sa 10K, P350 sa 5K, P300 sa 3K ug P200 alang sa 500m dash. Ang registration sugdan sa Oktubre 31 diha sa Toby’s Sports House sa SM City-Cebu, RUNNR sa Ayala Active Zone ug Cebu City Sports Center. (BANAT NEWS)