CEBU, Philippines - Bag-ong kategoriya ang idugang sa fourth leg sa Keiz BJ Motors and Phoenix Cyclomax Titan Invitational Motocross nga gikatakda karong Oktubre 23 didto sa Caduawan race track sa Tabogon, Cebu.
Isukit sa lumba ang peewee starter alang niadtong mga batang nagpangedaron og 7-9 anyos ug wala pa makasuway'g apil og mga lumba.
Tuyo ug tumong sa Keiz BJ Motors ug Phoenix Cyclomax sa pagdugang sa peewee starter category mao nga mahatagan og higayon ang mga bata sa pagkat-on ug pagpakita sa ilang linghod nga abilidad sa maong matang sa paugnat sa kusog.
Gawas sa indigay alang sa mga sumisikat nga riders, may lumba sab alang sa mga riders, kinsa napagngan og kahayag ug may paglaum pa silang mopakita sa ilang katakus ubos sa wanggits division.
Lain pang mga kategoriya sa lumba nga gipasiugdahan ni Keiz BJ Motors big boss Siegfred Ornopia mao ang expert, beginners open, local enduro, beginners limited edition, executive A, B ug C, intermediate, ladies special, mini 85cc. mini 65cc. ug peewee class.
Ang mga anak ni Siegfred nga sila si Brylle ug Kenken, manalipod sa ilang tagsa-tagsa ka titulo sa managlahing kategoriya. Si Brylle, 11-anyos, modepensa sa iyang korona sa mini class 85cc. Molumba sab siya sa beginners limited edition, samtang si Kenken, 9-anyos modepensa sa iyang korona sa mini class 65cc. ug sa peewee. Ang kinamanghuran nga si Keizer, 7-anyos mopakita sab og aksiyon sa mini 65cc ug sa peewee.
Manganhi pud ang DG Racing Team sa pagpangulo ni legendary coach sa Shell Yamaha nga si Dodong Galia gikan sa Maasin. Uban niya ang iyang mga anak nga silang Peewee ug PJ Galia ug Resjah Garin.
Laing riders gawas sa Sugbu ang moapil sab sa kompetisyon sama nilang Jovie Saulog ug sa iyang anak babaye nga si Janelle sa Manila ug Winsor Famorca sa Iloilo.
Ang lumba agi’g halad ni Siegfred alang sa tinuig nga pangilin sa ilang mahal nga patrona, Our Lady of Perpetual Help karong Oktubre 28-29.
"Naandan na nako nga magpalumba sa piyesta ni Mama Mary," matud pa ni Siegfred. "Walay piyesta nga dili uwanon, sukad nga nagpalumba ko, kaluoy sa Ginoo wala na gyud mag-uwan, three years na, mora’g nahimuot si Mama Mary," dugang pa niya.
Ang lumba gipaluyohan sa Phoenix Cyclomax Titan, Haojue Phils. ug sa Energy FM-Cebu.
Suportado sab kini ni Haojue Phils. marketing manager Edmund Pingkian, Phoenix Phils. accounting manager Jeoffrey Viñalon, Nanding Pedrano, proprietor sa Pedrano Machine Shop ug sa RMO Motor Parts. (BANAT NEWS)