"Run for Melinda"
CEBU, Philippines - Nangandam na ang tibuok Cebu running community sa dakung lumba alang sa namatay'ng Ultramarathoner nga si Melinda Ponce.
Si Ponce uban sa iyang tulo ka mga anak ug usa ka katabang gipatay sa iyang bana sa wala pa kini mokutlo sa iyang kaugalingong kinabuhi.
Ang notadong race director sa Sugbu nga si Joel Baring sa Sports and Fitness Enthusiasts (SAFE) nagkanayon nga hinay-hinay na nilang naporma ang mga detalye sa himuong tribute run nga ulohan og "Run for Melinda" nga tentatibong gitakda karong Domingo didto sa The Terraces sa Ayala Center-Cebu.
"We still have to finalize the details of the run pero segurado na gyud nga adunay ipahinungod nga lumba ang tibuok running community dinhi sa Cebu alang ni Melinda," matud pa ni Baring.
Si Melinda, 53-anyos, usa sa mga banggiitang marathoner ug ang labing katapusan niyang kalampusan mao ang pagtapos sa Summit 60K Ultra Challenge niadtong Oktubre 8 didto sa Talisay.
"Na-shock gyud ming tanan nga mga kaila niya sa running ug mismo ako nakahilak dihang nakadungog sa balita," segun pa ni Baring. "I hope this run will serve as a tribute to Melinda and nagtuo ko nga mopakita og suporta atong mga kauban sa running."
Ang giplanohang lumba usa lang ka short distance run ug adunay registration fee nga P150.
Gipahibalo usab ni Baring nga adunay pagahimuon nga Santos nga Misa inig human sa lumba. - (BANAT NEWS)
- Latest
- Trending
