Denver Cuello bag-ong WBC silver champion

CEBU, Philippines - Duol na kaayo si Denver “The Excitement” Cuello sa damgo niini nga moaway sa world title dihang milampos siya pag-angkon sa WBC silver minimumweight title pinaagi sa pag-knockout sa Mehikanong si Carlos Perez didto sa Mexico.

Ang Filipino knockout artist nga si Cuello kinsa adunay impresibong record nga 29-4, 19KOs, abtik kaayo nga nakapatugpa og mga makabungog nga kumo ngadto sa mas taas nga Mehikano ug gikan didto gisundan og mga bangis nga kombinasyon.

Misuway pa paglabay og right straight si Perez, apan gitubag kini og left uppercut ni Cuello nga maoy nakapahagsa sa Mehikano sa 2:31 sa first round.

Sa maong kadaugan napakita ni Cuello nga andam na kini alang sa world title fight ug hinay-hinay na nga nanglihay ang mga kampiyon sa iyang dibisyon.

Ang Pinoy manager ni Cuello nga si Aljoe Jaro nagkanayon nga hayag na ang sangka ni Cuello ni WBC no.1 rated Gannigan Lopez sa Mexico sa Disyembre o sa Enero.

Ang bag-ong gikoronahang kampiyon nga si Cuello mabalik sa Manila sa Martes. - LPM gikan sa Philboxing (BANAT NEWS)