Dark Team midaug

CEBU, Philippines - Nagkumboya sa ilang pwersa ang mga batos sa topseed University of the Visayas (UV) Baby Lancers ug ang third-ranked Cebu Eastern College (CEC) Dragons arong pangulohan ang Dark Team ngadto sa usa ka kulba-hinam nga 84-80 nga kadaugan batok sa Light Team kagahapon atol sa gipahigayong Cebu Schools Athletic Foundation, Inc. (CESAFI) All-Star high school edition didto sa Cebu Coliseum.

Ang point guard sa Dragons nga si Marvin Bauya maoy mi-iskor sa mga krusyal nga tirada sa daginutong oras aron sila maka-ipsot ug mibahug siya'g 17 puntos aron maoy mapiling All-Star MVP.

Siya ug teammate James Neil Sumayang maoy nahatagan og ubay-ubay nga oras sa ilang All-Star coach nga si Jerry Jaranilla samtang ang mga pambato sa Baby Lancers nga naglakip kanilang Andres Paul Desiderio ug Nelson Peralta mitabang sab sa opensa.

Si Henric Dawn Ochea sa second-seed Sacred Heart School-Ateneo de Cebu (SHS-AdC) Magis Eagles kinsa maoy ikasangka sa Dragons sa semifinals unya sa umaabot Huwebes, Oktubre 20, maoy nangu sa Light squad sa iyang 20 puntos ug ang iyang teammate nga si Julius Cadavis miabuno og 17 puntos.

Si Nikko Otadoy, ang topgunner sa Cebu Institute of Technology-University (CIT-U) Baby Wildcats, miamot og 15 puntos ug si Rommel Diapera, ang labing consistent nga scorer sa University of southern Philippines-Foundation (USP-F) Baby Panthers mihakot og 12 puntos.

Ang coach sa Light Team mao si Rommel Rasmo Magis Eagles.

Ning pagsuwat sa may alas 5 sa hapon, ang Dark Team ni Felix Belano sa UV Lancers nakigsangka batok sa Light Team ni coach Roel Gomez sa UC.

Sa miaging tuig, giharus sa Dark Team ang Light Team sa All-Star Games sa duha ka divisions---70-67 nga kadaugan sa collegiate division ug 82-79 sa secondary division.

Sa side events, ang point guard sa University of San Jose Recoletos (USJR) Jaguars nga si Benjamin Capillar maoy nahimong hari sa 3-pt shootout dihang ilang gipatapsingan si Francis Luigi Bercede sa UC, 13-12.

Si Capillar sab maoy nag-una sa elimination round sa iyang 16 puntos ug si Bercede mi-abante uban sa iyang 12 puntos. Mi-abante sab sila si Harold Cincoflores sa UV ug si Joseph Sedurifa sa USP-F kinsa nagtabla sa 14 puntos.

Si Capillar mibahug og 14 puntos sa semifinals samtang si Bercede igo lang mihimo'g nuybe puntos apan natagak silang Cincoflores ug Sedurifa kinsa parehong mi-iskor og siete puntos.

Sa Slam Dunk Contest nga nalangay sa makadiyot tungod kay nalimtan ang flash cards nga maoy gamiton sa pag-iskor, ang 6-6 nga sentro sa UV nga si Andrew Avillanoza maoy nahimong kampiyon pinaagi sa iyang 43 puntos.

Iyang giplide ang iyang teammates nga sila si Rene June Saycon ug Wowie Kadir.

Mi-abante si Avillanoza sa top four uban kang Kadir, Rene Pacquiao sa Southwestern University (SWU) Cobras ug ang Cobra rookie nga si Alvin Dadace.

Puntos matag usa:

Dark (84)— Bauya 17, Sumayang 12, Sedillo 9, Huevos 8, Desiderio 8, Peralta 7, Villarosa 6, Ortgea 4, Trangia 4, Lucero 3, Niere 4, Pono 2

Light (80) — Ochea 20, Cadavis 17, Otadoy 15, Diapera 12, Delima 5, Kong 3, Yu 2, Abapo 2, Villarta 2, Viajar 2.  - BANAT NEWS