2011 CESAFI All-Star Games

CEBU, Philippines - Ang mga piniling magduduwa, labing hait nga three-pointer shooters ug slum dunk artists sa 11th Cebu Schools Athletic Foundation Inc. ang mopakita sa ilang katakus karong adlawa sa tinuig nga CESAFI Light vs. Dark All-Star Games diha sa Cebu Coliseum.

Sa dili pa sugdan ang duwa, adunay pagahimoon nga Slam Dunk Contest ug 3-Point Shootout nga maoy molamas sa All-Star Games.

Dinhi magtigi ang mga acrobats o high-leapers sa CESAFI ug aron paghatag og kahigayonan sa uban, wala giapil si 6-foot-9 center Junemar Fajardo sa University of Cebu (UC) Webmasters ug ang 6-foot-6 center Justin Aboude sa Southwestern University (SWU) Cobras. Ang duha mag-abot atol sa duwa diin si Fajardo maoy mangulo sa Light Team ni coach Roel Gomez ug si Aboude sa Dark Team ni coach Felix Belano.

Tulo ka players sa University of the Visayas (UV) Green Lancers nga sila si Andrew Avillanoza, Rene Jun Saycon ug Jerome Silva ug sila si Rene Pacquiao, Eleazar Armecin ug rookie Monbert Arong sa SWU ang magtigi sa slam dunk.

Mosalmot sab silang Joven Cortes sa University of San Carlos (USC) Warriors ug si Jose Allan Dimco sa Cebu Institute of Technology-University (CIT-U) Wildcats.

Ang mga tirador sa CESAFI nga mosalmot sa 3-point shootout mao silang Gerald Joseph Ampoon ug Luigi Bercede sa UC, Harold Cincoflores ug Phil Mercader sa UV, Christian Floyd Taboada ug John Michael Graf sa CIT-U, Benjamin Capillar ug Jayson Olbedado sa University of San Jose-Recoletos (USJ-R) Jaguars, Giovanni Padillo ug June Michael Cantonao sa USC, Bonifacio Guillena Jr. ug Armecin sa SWU ug sila si Joseph Sedurifa ug Randy Avila sa University of Southern Philippines Foundation (USPF) Panthers.

Sa miaging tuig sa All-Star Games, giharos sa Dark Team (East) ang Light (West) nga pareho sab silang midaog og tres puntos. Sa juniors division, ang Dark midaog sa iskor nga 82-79, samtang ang seniors midaog sa iskor nga 70-67. (BANATSPORTS)