Convergys, Teletech milubong sa tagsa-tagsa nilang karibal

CEBU, Philippines - Gilampurnas sa defending champion Convergys Wolves ug Teletech Titans ang tagsa-tagsa nila ka karibal sa Cebu Powerade E-League Basketball Tournament diha sa City Sports Club-Cebu   gym sa Cebu Business Park.

Nagpabiling walay pilde ang Convergys human gimasaker ang Kyocera, 124-41.

Si Ronald Mabanto miburak og 19 puntos aron pangulohan ang Convergys, samtang si Dean Junber Escalon mitampo og 17 puntos. Sila si Emmanuel Auman ug Joseph Espanola nagkumboya og 26 puntos.

Sa laing duwa, ang Teletech walay kukaluoy nga milubong sa Accenture, 100-62.

Nangulo sa maong kadaugan mao si Sherwin Anghay, kinsa mipabuto og 22 puntos, gisundan nilang Lourenz Limpangog ug Sherwin Resilla nga adunay 18 puntos matag usa.

Sa laing bahin, ang Calltek nidaog pinaagi sa forfeiture batok sa Executive Boutique. (BANATSPORTS)