5th Governor's Cup Horse Show didto sa Liloan

CEBU, Philippines - Ipahigayon na karong adlawa ang northern Cebu elimination sa 5th Governor’s Cup Horse Show and Competition didto sa Sitio Cabancalan sa Brgy. Jubay, lungsod sa Liloan.

Motambong sa maong kompetisyon mao mismo si Cebu Governor Gwendolyn Garcia ug uban ang mga opisyales sa Provincial Capitol.

Gawas ni Garcia motambong sab si Liloan Mayor Vincent Franco 'Duke' Frasco ug asawa niining si Christina Garcia Codilla-Frasco.

Ang presidente sa Cebu Equine Owners Breeders and Sportsman Association (CEOBSA) nga si Rodolfo Lechago, nagkanayon nga ang maong elimination stage, preparasyon alang sa mas dakung horse show unya sa Marso sunod tuig.

Moabot ngadto sa 30 ka mga cowboys gikan sa nagkadaiyang lungsod ug dakbayan sa amihanang bahin sa Sugbu ang mosalmot sa usa ka adlaw nga torneyo.

Aduna usab open category diin mga professional cowboys gikan sa nagkalain-laing dapit ang mahimong moapil.

Ang elimination round alang sa southern Cebu gitakda sa Disyembre didto sa Naga City.  (BANATSPORTS)