Magis Eagle nakaipsot sa 2OT

CEBU, Philippines - Hingpit na nga naangkon sa Sacred Heart School-Ateneo de Cebu (SHS-AdC) Magis Eagles ang ikaduhang luna sa semifinals human miposte og nipis nga kadaugan batok sa defending champion Cebu Eastern College (CEC) Dragons, 82-81 sa double overtime sa secondary match sa 11th Cebu Schools Athletic Foundation Inc. (CESAFI) kagahapon didto sa Cebu Coliseum.

Gilubong og 11 puntos sa third period, 42-53, ang Magis Eagles nakarekober sa final period ug dili na unta mosangpot ngadto sa overtime kun wala pa mosipyat ang usa ka free throw ni   Julius Cadavis.

Ang Magis Eagles, kinsa nagtangag og 13-2 nga baraha, aduna pa untay laing kahigayonan nga modaog dihang miabante kini og tres puntos, 71-68 sa katapusang sayes minutos sa unang overtime, apan si Alfred Sedillo sa Dragons miposa og triple aron ihatod ang duwa ngadto sa ikaduhang overtime.

Gikan niadto, nagpuli-puli na og pasulod sa ilang puntos ang duha ka kampo hangtod nga nadagit gyud sa Eagles ang makutas nga kadaugan.

Si Cadavis maoy nangu sa Magis Eagles nga mi-iskor og 25 puntos, samtang si Henric Dawn Ochea miabuno og 19 puntos si Herry Renzar Asilam mitampo og 13 puntos.

Ang 12-4 nga Dragons gipangulohan ni James Neil Sumayang, kinsa mibugwak og 36 puntos, 15 niini sa third period. - BANAT NEWS