Los Demonyos ug Super Idols magtigi sa korona sa 7th IBP

CEBU, Philippines - Naka-eskapo ang Los Demonyos ni coach Nrwin Honoridez batok sa defending champion Pecandela Law Firm sa iskor, 61-60 pinaagi sa overtime ug gilubong sa Super Idols ni playing coach Bong Pepito ang mas batan-ong Pañeros sa iskor, 56-38 aron parehong mo-abante sa finals sa nagpadayong 7th IBP-2011 Governor’s Cup basketball tournament didto sa Capitol Parish gym sa dan Escario, ning dakbayan.

Ang knockout finals pagahimoon karong umaabot Sabado didto gihapon sa nahisgotang benyu.

Sikit ang nahimong duwa tali sa Los Demonyos ug Pecandela diin nagtabla kini sa 18-all sa first period, 31-all sa halftime ug nagtabla gihapon human sa regulation sa 56-all.

Didto na mobahug og maayo sa overtime period ang Los Demonyos dihang ilang gipugngan ngadto lang sa kuatro puntos ang Pecandela.

Si Richard Bauson maoy nahimong bayani sa Los Demonyos dihang iyang napasulod ang iyang krusyal kaayong lay-up sa wala pa mohuni ang final buzzer. Siya sab ang nangu sa opensa pinaagi sa iyang 18 puntos ug gi-abagan siya nilang Art Flores, Lito Ortiz ug Edward Banzon kinsa parehong miamot og 11 puntos matag usa.

Ang high-leaping center nga si Mark Russ Gamallo miposa og 11 puntos aron pangulohan ang Pecandela samtang nagkumboya silang Tommy Yu, Sam Malazarte ug Jessie Capoy og 30 puntos.

Sa laing duwa, gidominar sa Super Idols ang duwa gikan gyud sa sinugdanan hangtod na sa kataposang segundo ilabi na kay wala makaduwa alang sa Pañeros ang ilang bigman nga si Erwin Heyrosa tungod sa piang.

Silang Fermin Pepito ug Benjo Macion maoy nangu sa Super Idols sa ilang 119 ug 17 puntos, matag usa samtang si Ting Ordeniza maoy nangu sa pilderong Pañeros sa iyang 10 puntos apan siya lang ang naka-iskor og double figures sa ilang team.