100 kapin na nagpalista sa 1st Casili Run
CEBU, Philippines - Miabot na ngadto sa kapin sa 100 ka entrante ang nagparehistro nga modagan sa 1st Casili Run For A Cause karong Oktubre 23 diha sa barangay Upper Casili-Mandaue basketball court sa dakbayan sa Mandaue.
Gipasiugdahan sa mga opisyales sa Our Lady of Fatima chapel sa nahisgutang barangay, ang lumba adunay tulo ka kategoriya ug kini mao ang 6K Open, 3K Open ug 3K Kiddie run.
Mga ganting salapi ang nagpaabot sa top performers sa 6K, samtang mga medalya ug tropeyo ang maangkon sa mga mananaog sa 3K run.
Usa kini ka fund-raising run diin ang mahipos nga kuwarta maoy gawion sa pagpaayo sa Our Lady of Fatima chapel nga magsaulog sa ilang kapistahan karong Oktubre 29.
Niadtong interesadong mosalmot, ang registration fee nagkantidad og P200 (with singlet) ug P50 (no singlet).
Mahimong magparehistro sa Obet Internet Café sa Upper Casili-Mandaue, Dave Housing Supply sa corner Cubacub ug H. Abellana Sts., Canduman, Mandaue City, Canduman Housing Supply ug sa VSL Tabok sa Mandaue City.
Alang sa dugang mga kasayoran, mahimong motawag ni Eddie Soco (4200401 o 09289403467), Vidal Cabatingan 4200320 o 5169676) o dili ba ni Obet Santillana (4200241 o 09174834932). (BANATSPORTS)
- Latest
- Trending
