UV Lancers mipilde sa CIT-U Wildcats

CEBU, Philippines - Misandig ang University of the Visayas (UV) Green Lancers ngadto sa ilang beteranong pointguard Harold Cincoflores, kinsa maoy nangunay pagkontrolar sa duwa atol sa crunchtime aron mo-iskor og 70-63 nga kadaugan batok sa Cebu Institute of Technology-University (CIT-U) Wildcats sa 11th Cebu Schools Athletic Foundation, Inc. (CESAFI) basketball season sa miaging gabii didto sa Cebu Coliseum.

Ang Lancers nga nagtinguhang motapos sa ikaduha sa elimination round aron pagseguro nga makakuha’g "twice-to-beat" advantage, gituboy ni Cincoflroes, kinsa miposa og sunod-sunod nga puntos aron mailog ang labaw, 57-56. Napun-an kini og siyete puntos gikan sa free throws nga gibahin nilang John Michael Abad ug Rene Jun Saycon aron mabaraw ang dautang plano sa Wildcats.

Human sa basket ni Cincoflores, misunod sab og patusak si Abad aron tunolan ang ilang koponan og tres puntos nga labaw, 59-56. Gikan niadto naggubat sa free throws ang duha ka habig diin mas daghan ang napasulod sa UV Lancers.

Lima ka free throws ang giamot ni Abad samtang ang duha gikan kang Saycon aron kontrolahon sa hingpit ang duwa.

Naputol ang maanindot nga sugilanon alang sa mainitong duwa sa Wildcats dihang tulo lang sa unom ka free throws ang napasulod sa rookie nga si Bridrick Brigoli.

Ang Lancers, kinsa igo lang sab midaog batok sa University of San Carlos (USC) Warriors , 54-50 niadtong Septiyembre 29, gipangulohan ni Cincoflores sa iyang 14 puntos ug si Edrian Lao miamot og 12 puntos.

Aduna na sila karo’y 8-2 win-loss nga baraha ug may nahibilin pang duha ka duwa, ang una batok sa SWU Cobras nga gikatakda ugma ug batok sa University of Southern Philippines Foundation (USPF) Panthers unya sa Martes.

Si Chester Curso maoy nangu sa 6-8 nga Wildcats sa iyang 19 puntos ug si Allan Dimco midugang og 15 puntos.  (BANATSPORTS)