Asenjo vs. Tadena sa Cobra Energy Drink Fight Night

BACOLOD CITY, Philippines  - Ipakita ni kanhi world title challenger Rommel Asenjo nga may takus pa siya nga moaway pag-usab diin iyang harungon si Arnel Tadena sa main event sa Cobra Energy Drink-ALA Promotions karong gabii didto sa Chinatown 888.

Magsilbe kini nga pre-fight event alang sa WBO light flyweight title fight tali ni ALA superstar Donnie Nietes ug Ramon Garcia ugma sa gabii sa University of St. La Salle Gym dinhi sa Bacolod.

Si Asenjo maoy challenger kaniadto alang sa WBO minimum weight title batok ni Raul Garcia niadtong Abril, apan napilde   pinaagi sa third round knockout didto sa Mexico.

Ning higayona, ang lumad nga taga-North Cotabato nga si Asenjo (20-3, 16KOs) mosuway pagbangon sa iyang karera batok ni Tadena (11-16-3, 4KOs).

Sa supporting bout, ang garbo sa Bacolod City nga si Mark Gil Melligen (14-4, 16KOs) makigharong ni Rufino Anale (6-11, 2KOs).

Si Rocky Bacor (4-3, 2KOs) makigsangka ni Jonathan Ricablanca, samtang si Wilberth Loberanis (5-1, 3KOs) mobatok ni Roger Echavez (2-4-1, 1KO) ug laing Melligen nga si John Rey moaway batok ni Toto Abing.  (BANATSPORTS)