Barriga daog, Tipon pilde

CEBU, Philippines -  Human ni Rey Saludar, misunod sab sa pagdaog si Mark Anthony Barriga, apan walay suwerte si Joan Tipon sa iyang kampanya sa AIBA World championships round of 16 didto sa Baku, Azerbaijan.

Si Barriga midaog batok ni Patrick Barnes sa Ireland, 20-12, samtang si Tipon miyukbo ngadto ni Zhang Jiawi sa China, 8-17.

Gihulagway sa ABAP delegation si Barriga nga usa ka “secret weapon” human sa iyang mabulokong daog.

Gusto untang mopakita’g katakus si Barnes, apan wala siya magsilbe sa mga santuko ni Barriga hinungdan nga nagkadugo ang ilong niini atol sa first round. 

Sa second round, si Barriga mihatag na sab og kagumkom nga kinumo ngadto ni Barnes aron mo-iskor og daog, 13-8. Karong adlawa, sila si Barriga ug Saludar makigsangka batok sa tagsa-tagsa nila ka kaatbang.

Si Barriga makigtakos ni two-time world champion ug Beijing Olympiad gold medalist Zou Shiming, samtang si Saludar makigsangka batok ni two-time Olympian Rau’Shee Warren sa United States. (BANAT NEWS)