Saludar midaog batok Yusufi

CEBU, Philippines - Nabuhi pag-usab ang paglaum ni Guangzhou Asian Games flyweight champion Rey Saludar alang sa Olympic gold medal.

Si Saludar maoy mibugto sa tulo ka nagkutay nga pilde sa PLDT-ABAP National Boxing Team didto sa AIBA World Championships sa Baku, Azerbaijan human iyang gilampaso si Safoviddin Yusufi sa Tajikistan kagahapon, 28-12.

Ang maong torneyo nagsilbeng qualifying event alang sa 2012 London Olympics.

Ang 2010 Asiad gold medal winner sa 52-kilograms nga si Saludar, miatake sa maayong depensa ni Yusufi pinaagi sa left hook ug right hook combinations.

Si Saludar, sa Polomolok, South Cotabato, nagkinahanglan pa og laing usa ka daog aron makakuha’g luna sa 2012 Olympics. (BANAT)