CEBU, Philippines - Gihurot og pilde sa Carcar spikers ang tanan nilang kontra aron sakmiton ang men's title sa Cluster 1 sa 7th Governor Gwen Garcia Unity Volleyball (GUV) Cup niadtong Domingo didto sa Bonifacio R. Bacaltos Sports Centrum sa lungsod sa Sibonga.
Nakahimo na'g impresyon ang Carcar spikers dihang ilang gilupig ang men's defending champion Talisay City atol sa opening match niadtong miaging semana didto sa Cebu International Convention Center (CICC).
Ang Carcar nakasagubang sa ilang kakusog uban ang kaigmat ug gipukan ang Naga, 25-5, 24-26, 25-14 ug Minglanilla, 25-23, 17-25, 25-14.
Napuhalan sab nila ang Argao, 25-16, 26-24, Sibonga, 25-14, 25-17 ug San Fernando pinaagi sa default.
Mikumbati'g maayo sa kadaugan sa Carcar mao sila si Bonvie Estrera, Dennis Sepulveda, Ariel Carumba, Ken Bhoyd Abunda ug ilang imports nga sila si Jason Uy ug Ryan Fuentes.
Sa laing bahin, ang Talisay bisan pa'g napilde, may purohan pa gihapon nga modepensa sa ilang korona kay nahimutang kini sa ikaduha ug nakaangkon sa ikaduhang lingkoranan sa quarterfinals.
Gipilde sa Talisay ang Minglanilla ug Naga City sa managsamang resulta, 25-15, 25-22, dayon mipulbos sa Sibonga, 25-19, 25-8, Argao, 25-11, 25-13 ug San Fernando pinaagi sa default.
Ang kadaugan sa Talisay gipangulohan ni Norvie Labuga uban sa suporta nilang Kennith Bensig, Jerone Maestre ug sa ilang imports Rhovyl Verayo ug Jesriel Pino.
Sa elementary division, ang Minglanilla maoy naghari ug gisundan kini sa Talisay City.
Ang top two performers sa nagkadaiyang dibisyon makakuha og pasaporte alang sa quarterfinals nga gikatakda karong Disyembre. (BANAT)