Lancers naglisud sa Warriors

CEBU, Philippines - Puwerteng paningkamot og wadwad sa University of the Visayas (UV) Green Lancers aron dili mahiagom sa posibleng upset batok sa University of San Carlos (USC) Warriors dihang mi-iskor kini og 54-50 nga kadaugan sa usa ka low-scoring collegiate game sa 11th Cebu Schools Athletic Association, Inc. (CESAFI) basketball season didto sa Cebu Coliseum.

Bisan tuod og kanunay silang naglabaw, wala gyud makalubong ang Lancers kay kanunay man sab mosikit ang Warriors ug daw wala lang himatikdi nga na-outscore sila sa third period, 8-13. Apan maayo na lang kay sila gihapon ang naglabaw, 42-37 paghuman sa maong kuwarter.

Ang jumpshot ni rookie Vincent Mendoza maoy naghatag og 10 puntos nga bentaha sa Lancers, 47-37, apan gitubag sab kini dayon sa Warriors pinaagi sa 12-2 run aron tablahon ang duwa, 49-all pinaagi sa krusyal nga follow-up ni Giovanni Padillo sa nahabiling 2:10 sa duwa.

Miabante pag-usab ang Lancers human sa duha ka free throws ni John Michael Abad, 53-50 sa katapusang 46.4 segundos.

Apan si Edrian Lao, ang labing consistent scorer sa Lancers maoy nangu sa kadaugan nga mihipos og 14 puntos. Si Mendoza miamot og 10 puntos alang sa Lancers nga naghupot na karon og 6-2 nga baraha.

Ang Warrior (6-4) nga pabiling buhi sa ilang kampanya alang sa semifinals, gipangulohan ni Sam Hermosa pinaagi sa iyang 16 puntos.  (BANATSPORTS)