Super idols nag-una sa ibp hoop

CEBU, Philippines - Gimakmak sa Super Idols Five ni playing coach Bong Pepito ang Los Demonyos pinaagi sa ilang 77-59 nga kadaugan kaniadtong Sabado aron masakmit ang liderato atol sa pagtapos sa firts round sa nagpadayong 7th IBP-2011 Governor's Cup basketball tournament didto sa Capitol Parish gym sa dalan Escario, ning dakbayan.

Gidominar sa Super Idols ang duwa pinaagi sa paningkamot sa ilang pointguard nga si Ramsey Quijano kinsa maoy hinungdan sa ilang pagbuylo didto sa third period diin miposte sila'g 20 puntos nga abante, 56-36.

 Tungod sa maong kadaugan, naghupot na karon ang Super Idols og 5-2 nga baraha ug nakamugna og triple tie tali sa ilang biktima ug sa Pecandela Law Firm apan pinasikad sa quotient system, mas dako ang nakuha sa Super Idols.    

Mibahug og 19 puntos si Quijano aron pangulohan ang Super Idols ug giabagan siya nilang Reiner Apolinario ug Benjo Macion kinsa midugang og 17 ug 14 puntos matag usa.

Silang Richard Bauzon ug Lito Ortiz maoy nangu sa Los Demonyos pinaagi sa ilang 15 ug 14 puntos matag usa.

Sa sayo pa, midaug sab ang Pecandela ubos ni skipper Mark Russ Gamallo batok sa Primos Inter Pares, 68-56.

Si Sam Malazarte maoy nangu sa Pecandela pinaagi sa iyang 16 puntos samtang si Mayor Mike Rama mibahug og 21 puntos alang sa pilderong Primos Inter Pares.

Sa laing duwa, gilubong sa Bhutakalz ang Jodin, 76-55 alang sa ilang ikatulong daog sulod sa pito ka duwa sa nagpadayong torneyo ug sa ika-upat ug kataposang duwa niadtong adlawa, midaug ang Pañeros batok sa Los Eagles, 65-51 alang sa ilang ika-upat nga daog batok sa tulo ka pilde.

Ang Bhutakalz naghupot na karon ug 3-4 nga baraha ug mas labaw og usa ka duwa batok sa 2-5 nga Jodin. Si Van Ligutan miposa og 20 puntos alang sa Bhutakalz samtang si Cris Ang midugang og 13 puntos.

Si Jarred Cabilte mi-iskor og 12 puntos alang sa Pañeros samtang sa habig sa napildeng Eagles, mihakot og 14 puntos si Jun Arabis.  (BANAT SPORT)