Powerade Kampiyon sa Cebu city Mayor's Cup

CEBU, Philippines - Gipalagpot sa Powerade Tigers sa ilang trono ang Alaska Aces, 105-90, alang sa kampiyonato sa 2nd Cebu City Mayor’s Cup Basketball Invitational sa miaging gabii didto sa University of San Carlos (USC)-Main gym.

Ang Powerade mitapos sa tulo ka adlaw nga torneyo sa record nga 2-1 diin nakigtabla sila sa host team M.Lhuillier Kwarta Padala-Cebu Niños kinsa midaog usab sa katapusan nilang duwa batok sa Meralco Bolts, 79-73.

Hinuon, ang Tigers maoy gibayaw nga kampiyon tungod sa “simple tie” rule dihang ila nang napilde ang Cebu Niños, 64-63.

Klaro na ang resulta sa sayung bahin pa lang sa duwa dihang mitukod og 19 puntos nga labaw ang Powerade sa halftime, 63-44.

Gipangulohan sa ilang franchise player nga si Gary David, ang Tigers mipadayun sa ilang bangis nga atake sa second half nga mipasamot pagamay sa tsansa sa Aces nga mubalik.

Si David maoy top scorer sa Powerade sa iyang 19 puntos, gisundan ni William Antonio nga midiga og 17, samtang si Josh Vanlandingham ug Doug Kramer miamot og 15 ug 12 puntos matag usa .

Bugtong higayun nga nakaduol ang Aces atol sa katapusang otso minutos diin gipakanaog nila sa nuybe puntos ang labaw sa Powerade, 78-87, apan wala kini milungtad tungod usab sa ilang daghan nga turn-overs.

Ang duha ka triples ni Vanlandingham sa 2:50 sa duwa maoy milansang sa daog sa Powerade, 101-86.

Ang star pointguard nga si LA Tenorio maoy mipas-an sa opensa sa Alaska sa iyang 24 puntos, samtang sila si Brandon Cablay ug Sonny Thoss nagkumboya og 28 puntos. (BANAT SPORT)