Akira milubong sa carmen copper

CEBU, Philippines - Gipukan sa Akira/Metrotiles ang Carmen Copper Corporation (CCC) sa iskor, 107-97 kaniadtong Domingo atol sa nagpadayong 2nd Aloguinsan Mayor’s Cup Open basketball tournament didto sa Alodome sa lungsod sa Aloguinsan, Cebu.

Sa sayo pa, midaug ang Angilan Destroyers ug parehas sa ilang ngalan, ilang gibungkag ang Gerongco Lumber, 95-75.

Mibahug og 25 puntos si Alano Caputolan aron pangulohan ang Akira gikan sa barangay Inayawan samtang laing tulo ka kauban ang mi-iskor sab og double figures lakip ang kanhi pro nga si Jimwell Torion kinsa miamot og 15 puntos.

Ang Carmen Copper gipangulohan sa laing ex-pro nga si Danny Aying kinsa miburak og tournament record 42 puntos ug si Alex Cainglet mihagdaw og 32 puntos.

Ang Aloguinsan cagefest gisugdan kaniadtong Sabado diin gisubhan og daog ang Charmys batok sa Triple L sa iskor, 97-85 ug ang Inner-G yano kaayong mipukan sa ACES, 124-102 sa usa ka high-scoring ballgame.

Si Wowie Escocio maoy nangu sa Inner G pinaagi sa iyang 38 puntos ug sila si Frangyl Omolon ug former pro Jercules Tangkay miamot og 24 ug 22 puntos matag usa.

Ang kanhi playmaker sa USC Warriors nga si Vernini Tangarorang miposa og 34 puntos aron pangulohan ang ACES ug si Demo Nuevo Filoteo midugang og 28 puntos.

Sa laing bahin, si Danny delos Santos mihakot og 28 puntos alang sa Charmys ug parehong miabuno og 18 puntos silang Ronan Isidro ug Adelbert Nuñez.

Si Eliud Poligrates maoy nangu sa pilderong Triple L sa iyang 40 puntos. Walo ka teams ang misalmot sa maong torneyo diin ang kampiyon makadawat og P100 thousand.

Si konsehal Mariolito Biton sa Aloguinsan maoy sports coordinator ug tournament chairman. (BANAT SPORT)